En la sessiun
d'avrigl vegn il cussegl grond a discutar la
legislaziun executiva chantunala tar la lescha federala davart il
provediment d'electricitad. Sut il presidi da Christoph Jaag ed en
preschientscha dal cusseglier guvernativ Stefan Engler ha la cumissiun
dal cussegl grond per ambient, traffic ed energia tractà la missiva da
la regenza tar il relasch d'ina lescha davart il provediment
d'electricitad dal chantun Grischun (LPrEl GR) e deliberà la fatschenta
per mauns dal cussegl grond.
Il legislatur federal ha attribuì als chantuns differentas
incumbensas executivas. En il chantun Grischun duai vegnir relaschada
per quest intent ina lescha executiva concisa che sa restrenscha a la
regulaziun da quai ch'è absolutamain necessari. Dal puntg da vista
material observa la nova lescha ils suandants princips: La proprietad
vertenta vi da las raits da distribuziun vegn mantegnida. I na vegnan
creadas naginas disposiziuns che han l'intent da rectifitgar las
structuras sin cumond dal stadi. Percunter duai la lescha pussibilitar
da midar las structuras respectivamain da consolidar il provediment
d'electricitad en il chantun sin basa voluntara. En il sectur dal
provediment d'electricitad restan las vischnancas vinavant responsablas
per lur incumbensas d'avertura en connex cun la planisaziun dal
territori.
Suenter avair discutà detagliadamain il project ha la cumissiun
concludì d'entrar en il project e da proponer al cussegl grond da
deliberar il sboz da lescha da la regenza.
Suenter sias tractativas davart la legislaziun executiva chantunala
tar la lescha federala davart il provediment d'electricitad ha la
cumissiun sa laschà infurmar da represchentantas e da represchentants
dal departament da construcziun, traffic e selvicultura e da l'uffizi
d'energia e da traffic davart ils problems e davart las problematicas
ch'il chantun Grischun ha actualmain ed en l'avegnir en il sectur da la
colliaziun cun il traffic public.
Infurmaziuns:
Christoph Jaag, president da la cumissiun per ambient, traffic ed
energia, tel. 081 330 44 14
Gremi: cumissiun per ambient, traffic ed energia
Funtauna: rg cumissiun per ambient, traffic ed energia