La regenza grischuna ha tramess en consultaziun il sboz tar la revisiun totala da la lescha davart las scolas popularas dal chantun Grischun (lescha da scola). Cun la revisiun totala vegn la legislaziun da scola repassada en moda cumplessiva tant areguard il cuntegn sco er areguard dumondas formalas. Quai duai gidar la scola populara dal Grischun a tegnair pass cun las sfidas futuras. La consultaziun dura fin ils 15 da fanadur 2009.
La legislaziun da scola vertenta sa basa en general sin la lescha da scola dals 19 da november 1961. En il decurs da decennis è quella adina puspè vegnida cumplettada cun novas ordinaziuns. Quai ha la finala chaschunà che questa ovra reglamentara è daventada nunsurvesaivla. Malgrà diversas revisiuns na correspunda la basa legala actuala en blers puncts betg pli a la realitad ed a las pretensiuns che vegnan fatgas a la scola populara. Ultra da quai è la regenza vegnida incumbensada ils ultims onns da realisar bundant 100 propostas da refurma ch'èn relevantas per la furmaziun, 19 incumbensas parlamentaras sco er differentas mesiras dal rapport grischun da famiglia.
Cun la revisiun totala planisada vegn la legislaziun da scola repassada en moda cumplessiva areguard il cuntegn ed areguard dumondas formalas e messa sin ina nova basa, uschia che la scola populara grischuna è en cas da far frunt a las sfidas futuras. Parts da la lescha davart la promoziun da persunas cun impediments (pedagogia speziala) sco er da la lescha da linguas vegnan integradas en la lescha da scola. Ultra da quai sa tracti da reglar las cumpetenzas en il sectur da la scola populara tenor la nova constituziun chantunala sco er tenor la nova concepziun da la gulivaziun da finanzas e da la repartiziun da las incumbensas tranter il chantun e las vischnancas (NGF grischuna).

Novaziuns en differents secturs

Las novaziuns las pli impurtantas pertutgan ils suandants secturs:
- Introducziun d'uras da bloc: Sin il stgalim primar vegni instruì l'avantmezdi en uras da bloc . Quellas garanteschan ina instrucziun nuninterrutta u in'assistenza gratuita dals uffants durant almain quatter uras l'avantmezdi.
- Purschida da structuras dal di che correspunda als basegns: Sch'il basegn è avant maun èn las instituziuns ch'èn responsablas per la scola obligadas da porscher structuras dal di che correspundan a quest basegn. Per l'utilisaziun da questa purschida pon las instituziuns ch'èn responsablas per la scola incassar contribuziuns finanzialas dals geniturs.
- 40 emnas da scola: Il pensum d'instrucziun vegn repartì da nov sin 40 empè da sin 38 emnas. Uschia sa reducescha il dumber da lecziuns per emna.
- Mesiras integrativas da la pedagogia speziala: Las scolaras ed ils scolars che han basegns pedagogics spezials frequentan da princip la scola regulara respectivamain la classa regulara. Ina separaziun en classas spezialas è mo admessa, sch'ina promoziun adequata en la classa regulara n'è betg pussaivla.
- Regulaziun da las cumpetenzas tenor la nova constituziun chantunala: Tut ils champs da regulaziun centrals da la scola populara èn francads en furma d'ina lescha (finamiras, organisaziun, instanzas, salarisaziun da las persunas d'instrucziun, finanziaziun e.u.v.) e vegnan relaschads dal parlament. En il rom da sia cumpetenza executiva relascha la regenza las regulaziuns necessarias dals detagls.

En ils suandants secturs sa tegna il project vi da las disposiziuns vertentas:
- Scolina: Il chantun Grischun n'introducescha betg in obligatori da scolina e la lescha da scolina resta sco ch'ella è.
- Entrada en scola: La scolarisaziun dals uffants vegn fatga sco fin ussa cun set onns.
- Valurs fundamentalas da la scola populara: La scola populara vegn finanziada dal maun public ed intermediescha a las scolaras ed als scolars ina furmaziun fundamentala solida. Ella resta francada en las vischnancas e mantegna las structuras da scola cumprovadas. Il chantun garantescha la qualitad, formulescha finamiras unitaras en ils plans d'instrucziun e fa prescripziuns davart la salarisaziun da las persunas d'instrucziun.
Ils documents da consultaziun pon vegnir consultads sin la pagina d'internet dal departament d'educaziun, cultura e protecziun da l'ambient www.ekud.gr.ch sut la rubrica Themen/Projekte. La consultaziun dura fin ils 15 da fanadur 2009.

Gremi: regenza
Funtauna: rg chanzlia chantunala dal Grischun