La regenza grischuna sustegna la proposta da la cumissiun da las instituziuns politicas dal cussegl dals chantuns che prevesa da pussibilitar la retratga cundiziunada d'ina iniziativa dal pievel en cas d'ina cuntraproposta indirecta. Da nov duain ils comités d'iniziativa survegnir la pussaivladad da retrair lur iniziativa dal pievel sut la cundiziun che la cuntraproposta indirecta entria er propi en vigur. Sche questa cuntraproposta vegniss refusada en in'eventuala votaziun da referendum, duess alura tuttina anc vegnir votà davart l'iniziativa dal pievel. Las midadas correspundentas da la basa legala vegnan proponidas d'ina iniziativa parlamentara sin plaun federal.
Sco quai che la regenza scriva en sia resposta da consultaziun, è er ella da l'avis che la situaziun giuridica actuala na saja betg cuntentaivla. Las iniziantas ed ils iniziants stoppian decider oz davart la retratga da lur iniziativa en in mument, en il qual il destin da la cuntraproposta indirecta na saja betg anc determinà. Perquai sustegna la regenza las stentas da meglierar questa situaziun. La nova pussaivladad previsa, che duai pussibilitar da retrair ina iniziativa sut la cundiziun che la cuntraproposta indirecta entria er propi en vigur, è - tenor l'avis da la regenza - ina soluziun adequata. Ella beneventa cunzunt ch'ella gida eventualmain ad evitar votaziuns nunnecessarias.

Da vischnancas e da regiuns
Tavau: Il project cunter crudada da crappa "Monstein" da la vischnanca da Tavau vegn approvà e sustegnì cun ina contribuziun da maximalmain 332'280 francs.
Flüela: La regenza ha incumbensà il departament da construcziun, traffic e selvicultura d'elavurar e da concluder cun l'uniun Pro Flüela ina cunvegna per tegnair avert durant 5 ulteriurs onns la via dal pass dal Flüela durant l'enviern.
Bravuogn: La revisiun parziala da la planisaziun locala da la vischnanca da Bravuogn dals 15 da december 2008 vegn approvada cun tschertas incumbensas e remartgas.
Schiers: La revisiun parziala da la planisaziun locala da la vischnanca da Schiers dals 25 da zercladur 2008 vegn approvada cun tschertas correcturas, incumbensas e recumandaziuns.
Susch: La planisaziun d'utilisaziun da la vischnanca da Susch dals 16 da favrer 2009, che sa referescha al project "Clinica holistica Engiadina", vegn approvada cun tschertas cundiziuns e prescripziuns.
Valzeina: La revisiun parziala da la planisaziun locala da la vischnanca da Valzeina dals 9 da december 2005 vegn approvada cun tschertas cundiziuns.

Projects da vias
La regenza ha approvà totalmain 9'035'000 francs per construir e per sanar ils suandants trajects da vias:
- via da l'Alvra: lavurs da construcziun, Preda - Palpuogna
- via d'Avras: lavurs d'impressari, punt dal Kirchbach
- via dal Landwasser: lavurs d'impressari, punt da la val d'Alvagni
- via sursilvana da la vart dretga dal Rain: lavurs da cuvrida, Castrisch - Glion
- via da Samignun: lavurs d'impressari e da cuvrida Vinadi - mulin da Spiss, tumbin da la Val da Föglia
- via da St. Antönien: lavurs d'impressari e da cuvrida, Gadenstätt - punt da Gadenstätt
- via da Val S. Pieder: lavurs d'impressari, St. Martin - Val S. Pieder

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun