100 onns legislaziun svizra da victualias - per l'uffizi per la segirezza da victualias e per la sanadad d'animals dal Grischun in motiv da far festa. Perquai avra l'uffizi sias portas per dar la chaschun a la populaziun da prender invista da las activitads multifaras ed interessantas da la controlla da victualias e dal servetsch veterinar public. Il di da las portas avertas ha lieu sonda, ils 16 da matg 2009, da las 9.00 fin a las 16.00.

Sin basa dal fatg che la legislaziun svizra da victualias e che l'associaziun da las chemicistas e dals chemicists chantunals da la Svizra existan dapi 100 onns, vegnan organisadas en tut la Svizra differentas acziuns. Per quest motiv avra l'uffizi per la segirezza da victualias e per la sanadad d'animals dal Grischun a Cuira sias portas per dar la chaschun a la populaziun da prender invista da sias activitads interessantas.
Sin in gir vegni mussà a maun d'experiments, da placats e da tavlas infurmativas, co che la lavur en l'execuziun dal dretg actual da victualias vesa or e cun tge apparats moderns che las spezialistas e ch'ils spezialists tschertgan fastizs. Las exposiziuns dattan bleras infurmaziuns impurtantas davart l'aua u davart l'element radon. En ils differents labors na pon betg mo vegnir persequitadas analisas interessantas. Anzi, mintgina e mintgin po sez cooperar activamain: p.ex. eruir, quant nichel che sia bischutaria cuntegna, u examinar, quant bain che ses egliers da sulegl protegian cunter la radiaziun ultravioletta. Ma er il servetsch veterinar dat - cun agid da demonstraziuns - invistas spectacularas da la diagnostica d'epidemias d'animals. Natiralmain na dastgan ina preschentaziun dal nov post spezialisà per chauns sco er ina demonstraziun attractiva cun chauns spezials betg mancar.
En in'ustaria da festa datti da baiver e da mangiar, ed er ils uffants vegnan a lur quint.

Il gir è dividì en ils suandants secturs:

A) Element vital "aua":
Exposiziun - degustaziuns - percurs

B) Laboratori veterinar-bacteriologic:
Preschentaziun da preparats d'obducziuns, demonstraziun da microscopia

C) Labors chemics:
Demonstraziun da differentas analisas chemicas e microbiologicas da victualias
Eruir il cuntegn da nichel en bischutaria
Mesirar, quant bain ch'egliers da sulegl protegian cunter la radiaziun ultravioletta

D) Exposiziun davart la segirezza da las substanzas chemicas:

L'etichetta: confusiun e scrittira pitschna ubain infurmaziun raschunaivla davart il product?

E) Exposiziun davart 100 onns legislaziun svizra da victualias:
Exposiziun cun objects e cun posters

F) Post spezialisà per chauns:
Preschentaziun da las incumbensas e da las activitads
Chauns detecturs en acziun: demonstraziun

G) Ustaria da festa cun divertiment musical
Il di da las portas avertas ha lieu sonda, ils 16 da matg 2009, da las 9.00 fin a las 16.00. L'uffizi per la segirezza da victualias e per la sanadad d'animals sa chatta a la Planaterrastrasse 11 a Cuira. Il program detaglià ed ulteriuras infurmaziuns èn publitgads sin la pagina d'internet www.alt.gr.ch .

Infurmaziuns:
- dr. med. vet. Rolf Hanimann, manader da l'uffizi per la segirezza da victualias e per la sanadad d'animals dal Grischun, tel. 081 257 24 11

Gremi: uffizi per la segirezza da victualias e per la sanadad d'animals dal Grischun
Funtauna: rg uffizi per la segirezza da victualias e per la sanadad d'animals dal Grischun