La regenza grischuna ha refusà ils recurs cunter la votaziun federala dals 17 da matg 2009 davart ils passaports e davart ils documents da viadi biometrics en il chantun Grischun cun l'argument ch'els na sajan betg motivads. Tut en tut èn vegnids inoltrads 108 recurs tar la regenza, 26 da quels èn da persunas che han lur domicil en il chantun Grischun.
Cun dumondas che han il medem cuntegn pretendan las recurrentas ed ils recurrents ch'il resultat da votaziun dal chantun Grischun vegnia declerà sco nunvalaivel e che la votaziun vegnia repetida u ch'ella vegnia verifitgada. Il project da votaziun federal davart ils passaports e davart ils documents da viadi biometrics è vegnì acceptà en il Grischun cun 23'484 cunter 19'866 vuschs.
Tenor l'avis da la regenza na preschentan las recurrentas ed ils recurrents naginas reclamaziuns che fissan - tenor lur gener u tenor lur dimensiun - adattadas d'influenzar il cler resultat da votaziun dal Grischun. Sco punct central supponan els mo ch'il resultat naziunal saja incorrect e ch'i sajan eventualmain capitadas irregularitads. Ellas ed els na descrivan e na motiveschan però naginas irregularitads u nagins eveniments concrets en il chantun Grischun che pudessan permetter ils dubis giustifitgads vi da la correctadad dal resultat da votaziun. Per quest motiv constatescha la regenza che tut ils recurs da votaziun na sajan betg motivads e stoppian pervia da quai vegnir refusads.

Gremi: regenza
Funtauna: rg chanzlia chantunala dal Grischun