La fin d'avrigl 2009 ha pudì vegnir cumprovà sin il St. Luzisteig tar Maiavilla l'emprim chaun-vulp en il Grischun. Quai è la sisavla cumprova per la Svizra. En il Grischun vegni examinà da metter il chaun-vulp sin la glista da las spezias permessas.

Ils 27 d'avrigl 2009 ha in curridur chattà in chaun-vulp mort sin in prà sut il St. Luzisteig, betg lunsch davent dal cunfin dal Liechtenstein. El ha annunzià quai immediatamain a la collecziun da la scienza natirala dal principadi da Liechtenstein. L'animal è alura vegnì surdà al museum da la natira dal Grischun, nua ch'ils scleriments detagliads han mussà ch'el è eventualmain vegnì stgarpà d'in chaun d'ina grondezza mesauna. L'animal masculin era fitg magher, aveva memia pauc pais ed era infectà fermamain da zeccas.
Dapi l'onn 1997 èn vegnids registrads enfin ussa tschintg chauns-vulp en Svizra, numnadamain en ils chantuns Argovia, Giura ed Uri. La gronda part dals animals è stada masculina ed è vegnida da populaziuns da la Germania che derivan d'animals ch'èn vegnids laschads libers e ch'èn immigrads da l'ost. Er quest animal dastgass derivar dal territori Baviera - Vorarlberg ed esser immigrà en il Grischun tras il principadi da Liechtenstein. Per regla na datti betg chauns-vulp - che vegnan er numnads enoc - en il vest da l'Ural. En questas regiuns è el però vegnì tegnì pli baud sco animal da pellitscha dumandà. Il chaun-vulp na sa, cuntrari a l'urset american (procyon lotor), il qual el sumeglia, betg raiver. Sco omnivor sa nutrescha el d'animals pitschens e da fritgs.
Per betg laschar crescher anc pli fitg il squitsch sin ils animals da preda da la vulp e dal tais vegni examinà da metter il chaun-vulp sin la glista da las spezias permessas.

Infurmaziuns:
- dr. Georg Brosi, manader da l'uffizi da chatscha e pestga dal Grischun, tel. 081 257 38 91 (da cuntanscher da las 13.30)

Gremi: uffizi da chatscha e pestga
Funtauna: rg uffizi da chatscha e pestga