Il chantun Grischun stgaffescha las ulteriuras basas legalas ch'èn
necessarias per introducir la votaziun electronica. La regenza ha
approvà la revisiun parziala respectiva da l'ordinaziun da la regenza
davart ils dretgs politics en il chantun Grischun. Suenter l'approvaziun
tras la confederaziun entra la revisiun parziala en vigur per il 1. da
fanadur 2009. Il motiv per las adattaziuns èn las directivas da la
confederaziun. Quella pretenda dals chantuns da stgaffir fin mez 2009
las basas legalas per centralisar e per armonisar ils registers
electorals da las Svizras e dals Svizzers a l'exteriur.
Las adattaziuns da l'ordinaziun ch'èn evgnidas concludidas
obligheschan las vischnancas da nov da manar in register electoral sin
basa da l'elavuraziun electronica da datas (EED). Questa soluziun
electronica sto il medem mument pussibilitar il transfer electronic da
datas al sistem chantunal da votaziun electronica. Ultra da quai vegn
fixà ed armonisà il cuntegn dal register electoral. La direcziun
administrativa dals registers electorals per las Svizras e per ils
Svizzers a l'exteriur vegn surlaschada vinavant a las vischnancas. Ella
na vegn betg centralisada. Tenor l'avis da la regenza è ina soluziun
decentrala per manar ils registers electorals raschunaivla or dal puntg
da vista economic e statalpolitic.
Il chantun Grischun planisescha d'introducir fin l'onn 2011 la
pussaivladad da votar en moda electronica en in emprim pass per las
Svizras e per ils Svizzers a l'exteriur e pli tard alura per tut las
votantas e per tut ils votants. Avant che questa segunda etappa
d'amplificaziun vegn prendida per mauns duain - tenor il rapport "Vote
électronique en il chantun Grischun" ch'è vegnì deliberà da la regenza
il favrer - vegnir analisadas las experientschas ch'èn vegnidas fatgas
fin lura. Il cussegl grond vegn a tractar quest rapport en la sessiun
d'avust.
Il Grischun collavura cun Turitg sin il champ da la
statistica da furmaziun
En il sectur da la statistica da furmaziun collavura il chantun
Grischun en il futur cun il chantun Turitg. La regenza grischuna ha
approvà ina cooperaziun correspundenta. Il chantun Grischun
indemnisescha il chantun Turitg pauschalmain mintga onn cun 168'000
francs. Planisà èsi er da metter a disposiziun las infurmaziuns davart
la statistica da furmaziun sin ina pagina d'internet.
La statistica da furmaziun duai metter a disposiziun basas
impurtantas ed analisar ils svilups en il sectur da furmaziun da la
scola preliminara fin a la scola auta. Per quest intent ha l'uffizi
federal da statistica lantschà l'onn 2004 il project "Modernisaziun da
las retschertgas en il sectur da furmaziun". La realisaziun vala sco
sfida per ils chantuns. En quest connex èsi sa mussà baud che chantuns
pitschens n'èn strusch en cas d'endrizzar e da manar agens sistems cun
custs e cun in engaschament da persunal raschunaivels.
Tenor l'avis da la regenza è ina excorporaziun da la statistica da
furmaziun ed ina collavuraziun cun il chantun Turitg pia ina soluziun
effizienta. Sin il champ da la statistica da furmaziun ha Turitg
experientscha da blers onns ed in know-how fitg grond da la statistica
che sa basa sin l'informatica. Er ils chantuns Turgovia e Glaruna han
fixà ina collavuraziun cun Turitg.
Da vischnancas e da regiuns
- Calfreisen: La renovaziun da la via champestra Pra Pitscha da la
vischnanca da Calfreisen vegn sustegnida cun ina contribuziun chantunala
da maximalmain 95'000 francs.
- Arosa, Tavau: Il plan dal cunfin tranter las vischnancas
d'Arosa e da Tavau vegn approvà.
- Mustér: La revisiun totala da la planisaziun locala da la vischnanca
da Mustér dals 30 da november 2008 vegn approvada.
Contribuziuns chantunalas a differentas instituziuns
- Fundaziun Hosang, Plankis: A la fundaziun Hosang, Plankis, vegn
garantida ina contribuziun da construcziun da maximalmain 37'300 francs
per engrondir il local per l'elavuraziun da laina sco er la cuschina
d'abitar en il lavuratori Plankis a Cuira.
Projects da vias
La regenza ha approvà totalmain 1'150'000 francs per construir e per
sanar il suandant traject da via:
- via dal Luzisteig: lavurs d'impressari tar la punt "Lochrüfe".
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun