Entaifer ils ultims onns è creschida la populaziun grischuna per 0,9%. La fin da l'onn 2008 han pia 190'459 persunas gì lur domicil en il Grischun. L'augment po vegnir attribuì sulettamain a l'immigraziun da persunas da l'exteriur, entant ch'il dumber da naschientschas è stagnà en il Grischun.

Augment pli ferm da la populaziun en il Grischun
Cun 190'459 persunas ils 31 da december 2008 è il dumber da la populaziun residenta permanenta dal chantun Grischun per 0,9% pli aut che l'onn precedent (188'762); dapi il cumenzament dals onns 90 è la populaziun mai pli creschida uschè ferm durant in onn. Malgrà quai è l'augment da la populaziun grischuna er l'onn 2008 cleramain sut la media svizra dad 1,4%.

Grondas differenzas tar il svilup regiunal
Entaifer il chantun è il dumber da la populaziun sa sviluppà en moda differenta l'onn 2008. En l'Engiadin'ota è la populaziun creschida il pli fitg cun +2,0%. In augment relativ ferm datti er en l'Engiadina bassa (+1,6%) sco er en la regiun Grischun dal nord (+1,5%). Tavau, la Viamala sco er trais regiuns talianas (Bregaglia, Mesolcina e Calanca) han medemamain pudì registrar ina creschientscha detg considerabla, entant ch'il Partenz ed il Puschlav èn stagnads. La Surselva (-0,3%), la regiun Grischun central (-0,5%) sco er la Val Müstair (-1,5%) han stuì prender en cumpra ina reducziun da la populaziun

Puspè in saldo negativ da las naschientschas
En cumparegliaziun cun l'onn precedent èn las naschientschas stagnadas l'onn 2008 sin in nivel bass en il Grischun (1'597 envers 1'599 l'onn precedent). L'onn passà èn vegnids registrads 1'631 mortoris, uschia ch'il Grischun registrescha puspè in saldo negativ da las naschientschas (-34). Cunzunt la Surselva, il Partenz e la Mesolcina han notà reducziuns pli grondas da las naschientschas
Remartgabel è en quest connex ch'il saldo positiv da las naschientschas da la populaziun residenta estra (+202) cumpensescha bunamain la tendenza fitg negativa da la populaziun svizra (-236)

Gronda immigraziun dals stadis vegls da la UE
Damai ch'il Grischun registrescha er per l'onn passà in saldo negativ da migraziun tranter ils chantuns, po l'augment da la populaziun sulettamain vegnir attribuì a l'immigraziun d'in fitg grond dumber da persunas da l'ester.

La part da la populaziun residenta permanenta estra è s'augmentada entaifer in onn da 14,8% a 15,6%. Per la fin da l'onn 2008 han perquai 29'619 burgaisas e burgais esters gì lur domicil fix en il Grischun.
Il pli ferm è l'onn passà er creschì il dumber da las abitantas e dals abitants da la Germania (+14%). Ellas ed els han uschia pudì extender lur posiziun sco gruppa da persunas estras la pli gronda en il Grischun. Er il dumber d'abitantas e d'abitants portugais è creschì a bunamain 10%, entant ch'il dumber da persunas da l'Italia u dals pajais dal Balcan è stagnà u schizunt sa reducì. Las gruppas relativamain pitschnas d'immigrantas e d'immigrants dad ulteriurs pajais da l'Europa occidentala sco da la Gronda Britannia, da la Frantscha e dals Pajais Bass èn creschidas pli ferm l'onn passà.

L'onn 2008 han 576 persunas pudì acquistar il dretg da burgais svizzer en il Grischun.

Circa ¾ da la populaziun grischuna viva en vischnancas che han dapli che 1'000 abitantas ed abitants
La fin da l'onn 2008 dumbrava il Grischun anc 26 vischnancas cun main che 100 abitantas ed abitants, ulteriuras 103 vischnancas avevan main che 500 abitantas ed abitants. Totalmain abitavan anc ca. 15% da la populaziun en questas vischnancas pitschnas.
Var 75% da la populaziun grischuna viva gia oz en vischnancas che han dapli che 1'000 abitantas ed abitants. Cun las numerusas fusiuns da vischnancas, ch'èn vegnidas messas en vigur il cumenzament da l'onn 2009 u ch'èn vegnidas concludidas per il cumenzament da l'onn 2010, vegnan ils pais - a chaschun da las proximas dumbraziuns - a sa spustar anc pli ferm en direcziun da las vischnancas grondas.

Maridar è vinavant en moda
L'onn passà è vegnì maridà 932 giadas en il Grischun (onn precedent: 898); quest dumber crescha gia dapi quatter onns puspè. Ultra da quai èn vegnids registrads l'onn passà 10 partenadis registrads. Il dumber dals divorzis sa reducescha dapi intgins onns; l'onn passà èn vegnidas separadas 400 lètgs en il Grischun, quai èn 31 damain che l'onn precedent.

Infurmaziuns:
Patrick Casanova, uffizi per economia e turissem, tel. 081 257 23 74

Gremi: uffizi per economia e turissem
Funtauna: rg uffizi per economia e turissem