La regenza grischuna approvescha da princip il project da la confederaziun da remplazzar l'etichetta d'energia da fin ussa tras in'etichetta d'ambient per autos novs. L'etichetta d'ambient nova duai vegnir applitgada a partir da l'onn 2010 tar la vendita d'autos novs. Ultra dal consum d'energia, da l'effizienza energetica e da la svapur da CO2 mussa ella, quant ferm ch'il diever da l'auto respectiv engrevgescha l'ambient.
Sco che la regenza constatescha en sia resposta davart la consultaziun da l'ordinaziun federala davart l'etichetta d'ambient, vegn quest sistem nov displaschaivlamain puspè relativà pervia da l'integraziun da l'effizienza energetica, quai vul dir dal consum d'energia en relaziun cun il pais dal vehichel. Spezialmain impurtanta è pervia da quai la moda e maniera, co che la grevezza per l'ambient absoluta ed independenta dal pais dal vehichel vegn resguardada. Uschia poi vegnir evità ch'i dettia puspè stimuls nungiavischads en la faussa direcziun sco tar l'etichetta d'energia veglia. La finamira è quella da cuntanscher in svilup en direcziun da vehichels che engrevgeschan main l'ambient.
Or dal puntg da vista actual da la regenza èsi pervia da quai gist da resguardar mo autos da persunas cun quest sistem. Per las autras categorias da vehichels na stattan las datas necessarias betg a disposiziun en moda fidada. Però duess la nova etichetta d'ambient vegnir applitgada er per il commerzi cun autos d'occasiun. La regenza propona er d'examinar l'introducziun da l'etichetta d'ambient per autos da furniziun, per vehichels utilitars levs e per motos e da l'integrar pli tard en l'ordinaziun.

Da vischnancas e da regiuns
Tavau: A la vischnanca da Tavau vegn garantida ina contribuziun chantunala da maximalmain 3'000'000 francs per engrondir il center da congress a Tavau. Resalvada resta la concessiun dal credit tras il cussegl grond.
Puschlav: Al project per reparar ils donns da lavina da l'enviern 2008-2009 da la vischnanca da Puschlav vegn garantida ina contribuziun chantunala da maximalmain 37'125 francs.
Puschlav: La revisiun parziala da la planisaziun locala da la vischnanca da Puschlav dal 1. da zercladur 2008 vegn approvada.
Lumbrein: La revisiun parziala da la lescha da construcziun da la vischnanca da Lumbrein ch'è vegnida concludida ils 16 da zercladur 2009 vegn approvada.
Scuol: La revisiun parziala da la planisaziun locala da la vischnanca da Scuol dals 30 da mars 2008 vegn approvada.

Chanzlia chantunala dal Grischun
Gremi: regenza
Funtauna: rg chanzlia chantunala dal Grischun