Ils 7 da settember 2009 cumenza la campagna "Es ti fit?" che duai sensibilisar la populaziun da sa nutrir en moda variada, da sa mover regularmain e da far sport en il mintgadi. La campagna è ina part integrala dal program grischun en moviment ch'è vegnì lantschà mez da l'onn 2008.

En il rom dal program grigioni in movimento / grischun en moviment / graubünden bewegt - che vegn purtà dal chantun Grischun e da la promoziun da la sanadad Svizra - vegnan promovids dapi mez da l'onn 2008 in nutriment equilibrà, il moviment regular e sport en il mintgadi. En stretga collavuraziun cun vischnancas, cun scolinas, cun scolas, cun uniuns, cun cussegliadras da mammas, cun medias e cun medis vegnan realisads 18 projects.
Ils uffants ed ils giuvenils sco er lur geniturs èn las gruppas en mira principalas dals projects. En il project parzial "Marenda" vegnan per exempel messas a disposiziun als geniturs ed a las persunas d'instrucziun infurmaziuns detagliadas davart ina marenda sauna per ils uffants. 40 scolinas han cumenzà il nov onn da scola cun moviment, vul dir cun il project "Cupitgarola". Las persunas d'instrucziun da la scolina han fatg ina furmaziun supplementara en la promoziun dal moviment dals uffants ed han survegnì in sustegn finanzial per cumprar urdains da moviment per ils uffants. Da nov è vegnì publitgà il project "Scola en moviment" che vul promover il moviment cumplessiv en las scolas grischunas. Quests trais projects chattan grond interess tar las persunas d'instrucziun, tar las politicras e tar ils politichers communals sco er tar ils geniturs.

"Es ti fit?"
Ina mancanza da moviment ed in nutriment betg equilibrà promovan ils facturs da ristga sco surpais e pressiun da sang auta, ed augmentan il privel d'ina "malsogna da la civilisaziun" sco malsognas cardiovascularas, diabetes dal tip 2 u cancer. En il Grischun patescha gia mintga settavel uffant da surpais. Stgars 4 pertschient da quests uffants han in fitg grond surpais. Per il chantun resultan custs totals da 50 milliuns francs per onn pervia dal surpais. In nutriment equilibrà ed avunda moviment èn agids impurtants, per che mintga singula e mintga singul sa sentia fit. Questa qualitad da vita è in avantatg che resulta directamain d'in stil da viver activ. Ultra da quai profitescha la sanadad en general a lunga vista.
Sut quest aspect preschenta l'uffizi da sanadad a la publicitad la campagna "Es ti fit?". Cun placats, cun inserats e cun spots da radio vegn la populaziun sensibilisada a partir dals 7 da settember 2009 per dumondas da sanadad en connex cun in pais saun.

La stgala - in urdain da fitness gratuit
La campagna duai motivar da reponderar las disas dal mintgadi. I dovra pauc per midar bler. In exempel simpel è da baiver aua empè da bavrondas dultschas. Il slogan "Es ti fit?" animescha da reflectar sur da sasez. Sin la pagina d'internet www.graubuenden-bewegt.ch pon ins publitgar in tip da fitness persunal. Plinavant stattan a disposiziun per tut las gruppas da vegliadetgna infurmaziuns actualas e praticas davart ils temas "mangiar" e "moviment".
La campagna "Es ti fit?" vegn cumplettada d'ina acziun da tatgaders pragmatica. Tenor il motto "Mintga pass quinta" pon organisaziuns e firmas tatgar temporarmain ils tatgaders dad "Es ti fit?" vi da las portas dals ascensurs. Quai è ina metoda cumprovada ed efficazia per influenzar en moda positiva il cumportament. Tgi che smatga il buttun da l'ascensur, vegn motivà directamain tras quest tatgader da prender la stgala empè da l'ascensur. Las bleras ed ils blers suondan questa recumandaziun!
Ulteriuras infurmaziuns: www.graubuenden-bewegt.ch

Infurmaziuns:
- cussegliera guvernativa Barbara Janom Steiner, scheffa dal departament da giustia, segirezza e sanadad, tel. 081 257 25 01
- dr. Rudolf Leuthold, manader da l'uffizi da sanadad, tel. 081 257 26 41
- Denise Rudin, manadra dal project grischun en moviment, uffizi da sanadad, tel. 081 257 25 18

Gremi: uffizi da sanadad
Funtauna: rg uffizi da sanadad