En sia ultima sesida ha la regenza grischuna concludì da s'engaschar er vinavant per mantegnair l'agentura consulara taliana a Cuira. Ella ha respundì ina petiziun correspundenta.

La regenza sa dosta cunter la serrada da l'agentura consulara taliana a Cuira
En il rom da las pussaivladads ha la regenza grischuna concludì da s'engaschar er en l'avegnir per mantegnair l'agentura consulara taliana a Cuira. Quai scriva ella en sia resposta a la petiziun ch'il comité "Pro Agenzia consolare" ha inoltrà ils 28 da december 2009 cunter la serrada da l'agentura consulara. En quella vegn la regenza supplitgada da s'engaschar per il mantegniment.
L'agentura consulara a Cuira ha – tenor l'avis da la regenza – ina gronda impurtanza per las burgaisas e per ils burgais da l'Italia e per il chantun Grischun. En il Grischun vivan actualmain circa 11'200 persunas ch'èn burgaisas da l'Italia. La regenza deplorescha la serrada intenziunada. Gia il cumenzament dal settember 2009 è ella s'engaschada en chaussa cun ina brev al ministeri da l'exteriur da l'Italia. En quest connex ha ella supplitgà las autoritads talianas d'examinar alternativas per la serrada intenziunada. Plinavant ha la regenza dumandà il departament federal d'affars exteriurs da tractandar il tema da la reorganisaziun da la rait consulara taliana a chaschun dal dialog tranter la Svizra e l'Italia davart la collavuraziun transcunfinala che ha lieu il schaner 2010.

Da vischnancas e da regiuns

• Trimmis, Valzeina: La regenza approvescha il project supplementar tar il project per renovar la via da guaud "Valzeina – Engi" da la vischnanca da Trimmis e da Valzeina. Als custs vegn garantida ina contribuziun da maximalmain 457'500 francs.
• Zizers: La revisiun parziala da la planisaziun locala da la vischnanca da Zizers, ch'è vegnida concludida ils 17 da matg 2009, vegn approvada.
• Vaz: En sia consultaziun a l'uffizi federal da traffic concernent la dumonda da las telefericas da Lai SA dals 25 da settember 2009 da dar la concessiun tenor il dretg davart las telefericas e d'approvar ils plans per construir e per manar sin il territori da la vischnanca da Vaz ina telecabina dad otg "Canols – Scharmoin", propona la regenza da dar la concessiun.

Contribuziuns chantunalas a differentas instituziuns

• Federaziun grischuna per il sport: La federaziun grischuna per il sport survegn l'onn 2010 ina contribuziun da maximalmain 31'000 francs or dal fond da sport per surdar il premi grischun per il sport, per realisar il parlament da sport, per metter a disposiziun ina infurmaziun giuridica e per l'activitad generala da la suprastanza.
• Club da ballape da Domat: Al club da ballape da Domat vegn pajada ina contribuziun da maximalmain 50'600 francs or dal fond da sport per cumprar in vehichel communal per nettegiar e per rumir la naiv da la plazza da pastget artifizial.

Projects da vias
La regenza ha approvà totalmain 10'700'000 francs per construir e per sanar il suandant traject da via:
- via naziunala A28: installaziuns electricas ed acquist da terren, sviament da Saas


Gremi: regenza
Funtauna: rg chanzlia chantunala dal Grischun