Pervia da l'introducziun da datas biometricas en ils passaports svizzers sto il chantun adattar sias disposiziuns giuridicas. A chaschun da sia ultima sesida ha la regenza grischuna approvà la revisiun totala correspundenta da l'ordinaziun davart l'emissiun da passaports svizzers e mess en vigur quella per il 1. da mars 2010. Ultra da quai refusa la regenza en ina consultaziun la proposta da la confederaziun da midar il sistem da l'imposiziun da taglia sin la proprietad d'abitaziuns.

Revisiun totala da l'ordinaziun davart l'emissiun da passaports svizzers pervia dals novs passaports biometrics
En connex cun l'introducziun dal passaport biometric svizzer 2010 reveda il chantun Grischun sias disposiziuns giuridicas tar la legislaziun federala davart ils documents d'identitad. La regenza grischuna ha approvà la revisiun totala correspundenta da l'ordinaziun davart l'emissiun da passaports svizzers e mess en vigur quella per il 1. da mars 2010, a medem temp sco quai che las novas disposiziuns federalas entran en vigur.
Er suenter l'introducziun dals documents d'identitad biometrics resta l'uffizi da fatgs da polizia e da dretg civil l'autoritad emettenta cumpetenta en il chantun. Da nov regla l'ordinaziun ch'ins na po betg pli duvrar fotografias digitalas fatgas ordaifer ils novs centers da documents d'identitad, perquai ch'i resultassan dapli custs per quests centers. L'import da las fotografias giu da purtaders da datas externs è dal rest collià cun in privel da segirezza e sto perquai vegnir refusà ord vista da la segirezza d'informatica.
Gia pli baud aveva la regenza concludì da stabilir en il Grischun maximalmain tschintg centers per la registraziun da las novas datas biometricas. Il mars vegnan per entant averts dus centers da registraziun en il Grischun, in a Cuira, l'auter a Zernez. L'ordinaziun adattada cuntegna ultra da quai la basa legala per pudair far ina cunvegna cun las autoritads dal chantun Tessin, che permetta a las abitantas ed als abitants dal district da la Moesa da laschar far il nov passaport a Bellinzona. Ina regulaziun cumparegliabla è gia sa cumprovada fin ussa cun il passaport provisoric.

La regenza refusa la midada da sistem tar l'imposiziun da taglia sin la proprietad d'abitaziuns
La regenza grischuna è da princip cunter la proposta da la confederaziun da midar il sistem da l'imposiziun da taglia sin la proprietad d'abitaziuns, che prevesa d'abolir l'imposiziun da taglia sin la valur da l'atgna locaziun. Plitost duaja vegnir mantegnì il sistem actual, pretenda la regenza en sia resposta da consultaziun a la cuntraproposta dal cussegl federal tar l'iniziativa dal pievel "Abitaziuns segiras en la vegliadetgna".
Sch'il cussegl federal duess tuttina insister sin la midada da sistem, fissi in giavisch central da la regenza d'integrar en la lescha d'armonisaziun da taglia ina soluziun cun ina taglia sin abitaziuns secundaras. Per ils chantuns turistics han las entradas da l'imposiziun da taglia sin la valur da l'atgna locaziun numnadamain ina impurtanza fundamentala, per tschertas vischnancas schizunt ina impurtanza existenziala. Las entradas totalas da l'imposiziun da taglia sin la valur da l'atgna locaziun importan per il chantun Grischun e per las vischnancas var 57 milliuns francs. Quai correspunda a passa 8 pertschient dals retgavs da la taglia sin las entradas, ed en grondas vischnancas turisticas è questa quota anc bler pli gronda. Per la regenza è ina taglia sin abitaziuns secundaras en il dretg federal perquai ina cundiziun stringenta ed in premissa per in'eventuala midada da sistem. Igl è pia l'incumbensa da la confederaziun da chattar ina soluziun persvadenta che permetta a las regiuns da muntogna da salvar lur entradas fiscalas actualas.
Ils 17 da zercladur 2009 è il cussegl federal s'exprimì cunter l'iniziativa dal pievel "Abitaziuns segiras en la vegliadetgna" da l'associaziun svizra da las proprietarias e dals proprietaris da chasas. El ha l'intenziun da suttametter ina cuntraproposta indirecta a l'iniziativa. Questa cuntraproposta prevesa d'abolir l'imposiziun da taglia sin la valur da l'atgna locaziun betg mo per las persunas pensiunadas, mabain per tut las proprietarias e per tut ils proprietaris d'abitaziuns, e sco cuntraprestaziun duain vegnir dismessas, cun excepziuns, las pussaivladads da deducziun vertentas.

Da vischnancas e da regiuns

• Circul da l'Engiadin'ota: La regenza approvescha la lescha davart la planisaziun regiunala che las votantas ed ils votants dal circul da l'Engiadin'ota han concludì ils 29 da november 2009. Ella ha er prendì enconuschientscha dal program per il svilup regiunal dal territori dal circul da l'Engiadin'ota – in program che dura plirs onns. Per realisar quel fin la fin da l'onn 2012 vegn deliberà in credit limità da 200'000 francs.
• Medel/Lucmagn: A la vischnanca da Medel/Lucmagn vegn garantida ina contribuziun da maximalmain 254'400.– francs per engrondir e per renovar l'allontanament d'aua persa en las fracziuns da Pardè, da Platta e da Baselgia.
• Tavau: En sia consultaziun a l'uffizi federal da traffic concernent la dumonda da las telefericas da Tavau Claustra SA dals 23 d'october 2009 da dar la concessiun tenor il dretg davart las telefericas e d'approvar ils plans per construir e per manar sin il territori da la vischnanca da Tavau ina sutgera da quatter "Ischalp – Brämabüel" (implant da remplazzament), propona la regenza da dar la concessiun.

Projects da vias
La regenza ha approvà totalmain 150'000 francs per construir e per sanar il suandant traject da via:
- via da la Lumnezia: lavurs d'impressari Val Mulina – Val Miedra

Chaussas persunalas

• Roger Danuser, domicilià a Cuira, è vegnì elegì per il 1. da fanadur 2010 sco substitut dal manader da l'uffizi da persunal.

 
Gremi: regenza
Funtauna: rg chanzlia chantunala dal Grischun