Ils gieus da fortuna èn ina gronda fascinaziun, questa fascinaziun po dentant daventar svelt ina dependenza. Ils 18 da favrer 2010 (9.00 – 17.00) organisescha l'uffizi dal servetsch social chantunal ina dieta davart la dependenza da gieus da fortuna. I vegnan preschentadas cifras e tendenzas sco er discutads ils temas da la diagnosa tempriva e da la prevenziun.

"La banca gudogna adina." – Er sche bleras persunas fortunadas na vulan betg crair quai, vala questa frasa spezialmain per gieus da fortuna. Las consequenzas per quellas e per quels ch'èn dependents da gieus da fortuna pon esser gravantas. Ultra dal donn finanzial po questa dependenza er chaschunar l'exclusiun da la societad, la ruptura cun l'atgna famiglia e la perdita da la plazza da lavur.
Davart il tema "dependenza da gieus da fortuna" organisescha l'uffizi dal servetsch social chantunal ina dieta che ha lieu gievgia, ils 18 da favrer 2010, en l'aula dal center da furmaziun per la sanadad ed ils fatgs socials, binari D, a Cuira. Expertas ed experts resumeschan ils fatgs e las cifras las pli novas e mussan ch'il dumber da persunas ch'èn dependentas da gieus da fortuna è s'augmentà massivamain tras il medium internet. Tras ils gieus en l'internet resta la dependenza pli savens zuppada, perquai che las giugadras ed ils giugaders na ston betg pli sa scuntrar en in lieu public.

Basegn d'agir cumprovà
Ch'igl exista in basegn d'agir en il sectur da la dependenza da gieus da fortuna, mussa la circumstanza ch'ils chantuns da la Svizra orientala extendan massivamain la prevenziun en quest sectur. Ils chantuns Son Gagl, Appenzell dador, Appenzell dadens, Glaruna, Grischun e Turgovia han elavurà in concept communabel per prevegnir a la dependenza da gieus da fortuna e per cumbatter quella. Per quest intent han ins installà ina pagina d'internet sut www.sos-spielsucht.ch sco er in numer da cussegliaziun per telefon (0800 040 080). Persunas pertutgadas sco er lur confamigliaras e lur confamigliars survegnan infurmaziuns impurtantas davart la dependenza da gieus da fortuna. Plinavant èn vegnids sensibilisads e scolads ils posts spezialisads regiunals per quest tema, per ch'els possian porscher la cussegliaziun spezialisada correspundenta e la triascha. La dependenza da gieus da fortuna na sa differenziescha strusch d'auters cumportaments da dependenza: Ina giada che la dependenza è sa sviluppada dal tuttafatg, organiseschan las persunas pertutgadas lur vita mo pli tenor ils gieus da fortuna. Tut il rest vegn negligì.

Dieta e lavuratoris
La dieta a Cuira sa drizza en emprima lingia a persunas spezialisadas dal sectur social. Professer Jörg Häfeli, docent e manader da project a la scola auta a Lucerna, vegn a tractar il tema "gieus da fortuna en Svizra: prevenziun, diagnosa tempriva, cifras e tendenzas". Christa Bot, psicologa IPA e manadra dal project interchantunal davart il gieu da fortuna da la Svizra orientala, vegn a preschentar la collavuraziun tranter ils chantuns da la Svizra orientala. Peter Schneeberger maina il post da cussegliaziun per dumondas da debits da la crusch cotschna dal Grischun a Cuira. El infurmescha davart las pussaivladads per sanar ils debits. Dr. Ines Bodmer dal center per cumportaments da dependenza escape a Turitg tegna in referat davart il tema "dependenza da gieus da fortuna: percorscher e tractar".
Il suentermezdi han lieu quatter differents lavuratoris. Quels èn deditgads als temas: "mussavia per cussegliar cas da dependenza da gieus da fortuna" (Christa Bot), "gieus da fortuna en l'internet" (Jörg Häfeli), "rectificaziun dals debits: schanza u utopia?" (Peter Schneeberger) e "lavur da cussegliaziun cun confamigliaras e cun confamigliars" (Ines Bodmer).


Infurmaziuns:
- Franz Bütler, manader dal servetsch social, uffizi dal servetsch social, tel. 081 257 26 68


Infurmaziun per las medias:
Las collavuraturas ed ils collavuraturs da las medias che vulan rapportar davart la dieta èn envidads cordialmain. Per motivs organisatorics vegni supplitgà da s'annunziar tar l'uffizi dal servetsch social (tel. 081 257 26 61; e-mail: pia.nikles@soa.gr.ch) fin glindesdi, ils 15 da favrer 2010. Il program detaglià po er vegnir retratg tar l'uffizi dal servetsch social. El po er vegnir consultà sin la pagina d'internet sut https://www.gr.ch/DE/institutionen/verwaltung/dvs/soa/ueberuns/Seiten/default.aspx.


Gremi: uffizi dal servetsch social
Funtauna: rg uffizi dal servetsch social