Il chantun Grischun duai sa participar a la cunvegna interchantunala per l'armonisaziun da contribuziuns da scolaziun. Quai propona la regenza grischuna. Ella ha deliberà la missiva correspundenta per mauns dal cussegl grond. Quel vegn a tractar la fatschenta durant la sessiun d'avrigl.

L'intent da la cunvegna interchantunala è da promover l'armonisaziun da las contribuziuns da scolaziun sin plaun naziunal. D'ina vart vul la cunvegna garantir in'armonisaziun formala dals stipendis cun fixar definiziuns unifitgadas per expressiuns dal dretg da stipendis. Da l'autra vart promova la cunvegna medemamain l'armonisaziun materiala. Latiers vegnan fixads per tut ils chantuns standards minimals valaivels per las limitas da vegliadetgna, per la durada dal sustegn u per las tariffas maximalas. Quai duai garantir l'access a la furmaziun per classas da la populaziun cun entradas bassas sco er il medem tractament da las abitantas e dals abitants esters en Svizra.

La nova cunvegna interchantunala per l'armonisaziun da contribuziuns da scolaziun è vegnida approvada da la conferenza svizra da las directuras e dals directurs chantunals da l'educaziun publica ils 18 da zercladur 2009.

Tras l'armonisaziun dal nov concordat da stipendis duain vegnir sminuidas las grondas differenzas ch'existan tranter ils chantuns tar las premissas per stipendis sin il stgalim secundar II. Questa finamira è ina sfida en connex cun la realisaziun da la nova concepziun da la gulivaziun da finanzas e da la repartiziun da las incumbensas tranter la confederaziun ed ils chantuns (NGF). Actualmain fixeschan ils chantuns il circul da persunas che survegnan stipendis en moda differenta. Uschia na vegnan per exempel persunas senza naziunalitad svizra betg tractadas egualmain en tut ils chantuns. Er l'autezza dals stipendis che vegnan pajads è en il cas singul differenta.

Ils chantuns pajan ca. 276 milliuns francs en furma da stipendis e 27 milliuns francs en furma d'emprests. En il chantun Grischun èn vegnids pajads or var 13,8 milliuns francs sco stipendis. Il chantun Grischun ademplescha gia las prescripziuns dal nov concordat da stipendis. Ina participaziun dal chantun Grischun a la cunvegna interchantunala n'ha naginas consequenzas finanzialas per il chantun.


Infurmaziuns:
president da la regenza Claudio Lardi, schef dal departament d'educaziun, cultura e protecziun da l'ambient, tel. 081 257 27 01


Gremi: regenza
Funtauna: rg chanzlia chantunala dal Grischun