Il chantun Tessin ed il chantun Grischun suttascrivan ina cunvegna davart la collavuraziun per l'emissiun da documents d'identitad. A las abitantas ed als abitants dal district da la Moesa vegn purschida la pussaivladad da laschar registrar las datas biometricas per il nov passaport svizzer 2010 a Bellinzona.

La confederaziun introducescha per il 1. da mars 2010 en l'entira Svizra datas biometricas en il passaport svizzer. La regenza grischuna ha decidì gia l'onn 2008 da registrar las datas biometricas en maximalmain tschintg centers da documents d'identitad regiunals. Grazia a la collavuraziun curtaschaivla ed optimala cun il chantun Tessin ha pudì vegnir stipulada ina soluziun interchantunala per las Svizras e per ils Svizzers che vivan en il district da la Moesa.

Il cusseglier guvernativ Luigi Pedrazzini e la cussegliera guvernativa Barbara Janom Steiner suttascrivan venderdi, ils 26 da favrer 2010, in contract da collavuraziun. Cun quest contract survegnan las Svizras ed ils Svizzers dal district da la Moesa a partir dal 1. da mars 2010 la pussaivladad da dumandar in document d'identitad en la vischinanza da lur domicil senza far lungs viadis e da laschar registrar las datas biometricas per il nov passaport svizzer a Bellinzona.


Infurmaziuns:
- cussegliera guvernativa Barbara Janom Steiner, scheffa dal departament da giustia, segirezza e sanadad, tel. 081 257 25 01


Gremi: departament da giustia, segirezza e sanadad
Funtauna: rg departament da giustia, segirezza e sanadad