L'uffizi per economia e turissem dal chantun Grischun ha publitgà ina broschura d'infurmaziun davart il stadi dal project "Structuras cumpetitivas e repartiziun da las incumbensas en il turissem grischun". La broschura dat ina invista cumplessiva dal project ch'è decisiv per l'economia da turissem grischuna.

Dapi ch'il cusseglier guvernativ Hansjörg Trachsel, schef dal departament d'economia publica e fatgs socials, ha lantschà l'onn 2006 quest project da refurma, èsi capità bler en il turissem. La broschura mussa, tge ch'igl è vegnì cuntanschì tras la refurma fin il cumenzament da l'onn 2010, e dat ina survista da la furmaziun da destinaziuns en las singulas valladas dal chantun. Ultra da quai vegnan resumadas las mesiras accumpagnantas da la refurma dal turissem. La broschura cumpiglia tut en tut 48 paginas e vegn repartida als circuls politics ed economics turisticamain interessads sco er a tut las organisaziuns turisticas en il chantun Grischun.

Realisà cun success la refurma da las structuras
La refurma dal turissem ha midà visiblamain las structuras e la repartiziun da las incumbensas en il Grischun. Da las 92 uniuns da traffic localas ch'i deva ina giada han actualmain anc circa 20 destinaziuns effizientas l'incumbensa sco tala da preschentar il turissem grischun sin il martgà. Cun meds finanzials unids avran ellas novs martgads, cumbineschan lur prestaziuns a products innovativs per uschia persvader novs giasts da vegnir en il Grischun. A medem temp sco la transfurmaziun da las organisaziuns da marketing vegnan realisadas ulteriuras mesiras che duain gidar a trair a niz optimalmain ils potenzials e las experientschas fatgas sco er a consolidar las novas structuras da marketing. Uschia duai er vegnir lantschada in'offensiva da qualitad per il turissem grischun che tegna quint da la gronda impurtanza dal factur "qualitad".

Consultaziun davart la nova finanziaziun dal turissem
La refurma dal turissem grischun prevesa er d'introducir ina nova finanziaziun dal turissem. Quella duai remplazzar las taxas communalas da cura e da turissem da fin ussa. Duas variantas èn avant maun: la lescha davart la finanziaziun dal turissem (taxa turistica chantunala) e la lescha davart l'armonisaziun dal turissem (lescha generala). La consultaziun davart quest project dura anc fin la fin da mars 2010.

La broschura po vegnir retratga gratuitamain
La broschura po vegnir chargiada giu da l'internet sut www.awt.gr.ch, rubrica "Themen/Projekte - Bündner Tourismusreform", u vegnir empustada directamain e gratuitamain tar l'uffizi per economia e turissem, Grabenstrasse 1, 7001 Cuira (telefon 081 257 23 42 u e-mail info@awt.gr.ch).


Infurmaziuns:
Eugen Arpagaus, uffizi per economia e turissem dal Grischun, tel. 081 257 23 77, 079 256 93 94


Gremi: uffizi per economia e turissem
Funtauna: rg uffizi per economia e turissem