A chaschun da sia ultima sesida ha la cumissiun da gestiun dal cussegl grond (CdG) concludì d'engaschar dr. Christian Huber sco sustegn da la giunta speziala per il cas Reinhardt.

En il sectur organisatoric duai la giunta speziala da la CdG, che fa scleriments pli detagliads dal cas Reinhardt, survegnir il sustegn d'ina persuna extrachantunala che ha l'experientscha necessaria da manar tras inquisiziuns. A chaschun da sia ultima sesida ha la CdG concludì d'engaschar dr. Christian Huber per questa incumbensa.
Cun Huber ha pudì vegnir chattada ina persunalitad fitg qualifitgada cun experientscha en ils secturs relevants. En il chantun Turitg è Huber stà activ – en la suandanta successiun – sco procuratur public, emprim procuratur public, derschader superiur, president da la dretgira da giuraders e cusseglier guvernativ. Sco cusseglier guvernativ ha el manà ils onns 1999 fin 2005 la direcziun da finanzas. Huber è commember da la PPS dal chantun Turitg, n'exequescha dentant naginas funcziuns da partida pli dapi sia retratga l'avrigl 2005. Dapi lura è el stà per gronda part a l'exteriur.


Infurmaziuns:
Marcus Caduff, parsura da la giunta speziala da la cumissiun da gestiun, tel. 079 304 70 91


Gremi: cumissiun da gestiun
Funtauna: rg cumissiun da gestiun