Suenter che la NGF grischuna è vegnida refusada per pauc, ha la regenza fatg in'emprima analisa e discurrì l'ulteriur proceder. Ella è persvadida che la gulivaziun da finanzas grischuna basegnia ina refurma fundamentala e ch'il basegn d'agir saja acceptà. Sin fundament dad interdependenzas sco er sin fundament da la discussiun davart las refurmas dal territori sto la nova gulivaziun da finanzas vegnir accordada cun ulteriurs projects da refurma planisads – spezialmain en ils secturs da la scola populara, da la finanziaziun dals ospitals e da la tgira. La NGF grischuna duai vegnir lantschada da nov suenter l'onn 2012, cur ch'ils projects da refurma èn vegnids tractads en il cussegl grond.

Cunquai ch'il project da la NGF grischuna (nova concepziun da la gulivaziun da finanzas e da la repartiziun da las incumbensas tranter il chantun e las vischnancas) è vegnì refusà, ha la regenza discurrì l'ulteriur proceder. La regenza accentuescha sia voluntad da refurma en quest sectur. Ella è persvadida ch'in basegn d'adattar la gulivaziun da finanzas grischuna actuala cun sias mancanzas saja avant maun malgrà il na da la populaziun e che quest basegn da refurma saja acceptà. Tar sia analisa ha la regenza er examinà, sche alternativas fissan pussaivlas tar il project refusà e co che quellas pudessan vegnir coordinadas cun ils ulteriurs projects da refurma.

Il chantun Grischun ha mumentan da tractar differents projects da refurma impurtants che pertutgan directamain l'adempliment e la repartiziun da las incumbensas tranter il chantun e las vischnancas e che stattan en stretg connex cun la gulivaziun da finanzas chantunala. Concretamain pertutgadas èn las revisiuns
- da la finanziaziun dals ospitals (sto vegnir realisada fin il 1. da schaner 2012)
- da la legislaziun da scola (consultaziun terminada)
- da la protecziun dals uffants e da las persunas creschidas (fatgs tutelars, sto vegnir realisà fin il 1. da schaner 2013)
- da la lescha davart il guaud

Plinavant sto vegnir decidì anc quest onn en il cussegl grond davart il project da la finanziaziun da la tgira. La regenza vegn a proponer al parlament l'atun 2010 in rapport davart la strategia futura da las refurmas territorialas. En spezial la nova refurma da las structuras territorialas pudess esser decisiva per la concepziun futura da la nova NGF grischuna.

La regenza vul urgentamain elavurar quels projects ed als proponer al cussegl grond quest onn u l'onn proxim. Il dretg federal surordinà decida davart las directivas areguard il cuntegn sco er areguard ils termins dals projects menziunads (finanziaziun da la tgira, finanziaziun dals ospitals e protecziun dals uffants e da las persunas creschidas). Avant d'avair in nov project da gulivaziun da finanzas duai a medem temp vegnir tractada e deliberada la revisiun totala da la lescha da scola. Uschia duai vegnir decidì ordavant davart ils puncts dispitaivels en il sectur da la scola populara sco er davart las incumbensas dal chantun e da las vischnancas.

Tar l'elavuraziun da quests projects ston vegnir resguardadas las finamiras ed ils princips renconuschids da la NGF grischuna. Uschia na duain per exempel vegnir creadas nagins entretschaments finanzials novs tranter il chantun e las vischnancas. La regenza vegn – en il senn d'ina perspectiva – a preschentar en las missivas correspundentas, tge impurtanza che la revisiun concernenta vegn ad avair per la NGF grischuna futura.

Proceder en etappas
La coordinaziun necessaria ed accurata tranter ils projects da refurma ch'èn vegnids numnads qua survart ed ina nova NGF grischuna è mo pussaivla, sch'i vegn procedì en etappas. La regenza parta dal fatg ch'ils cuntegns da quests projects èn clers fin la fin da l'onn 2011 e ch'ins vegn a pudair lantschar da nov ina NGF grischuna probablamain l'onn 2012. La concepziun concreta è anc averta. La nova NGF grischuna duai s'orientar en quai che pertutga ses cuntegn als projects da refurma, sa drizzond tenor las finamiras principalas dal project refusà.


Infurmaziuns:
Cusseglier guvernativ dr. Martin Schmid, schef dal departament da finanzas e vischnancas, tel. 081 257 32 01


Gremi: regenza
Funtauna: rg chanzlia chantunala dal Grischun