Ils 16 da mars 2010 han gì lieu en il Grischun ils examens d'admissiun per la 3. classa dal gimnasi, per la scola media professiunala e per la scola media commerziala. Als examens èn cumparids 470 candidatas e candidats. Da quels han 144 fatg cun success l'examen d'admissiun per la scola media professiunala e per la scola media commerziala e 183 l'examen per il gimnasi. Las decisiuns d'examen èn vegnidas communitgadas en scrit als geniturs ed a las persunas responsablas per l'educaziun. Activitads illegalas avant ils examens han chaschunà ina denunzia penala da vart da l'uffizi per la furmaziun media-superiura.

En connex cun la realisaziun dals examens d'admissiun per la 3. classa dal gimnasi, per la scola media commerziala e per la scola media professiunala èn vegnidas constatadas activitads illegalas, uschia che l'uffizi per la scolaziun media-superiura ha inoltrà ina denunzia penala tar la procura publica dal chantun Grischun. En il rom da l'inquisiziun penala èsi vegnì enconuschent ch'insaquantas scolaras e ch'insaquants scolars èn vegnids en possess da singulas dumondas da l'examen da tudestg sco emprima lingua. Quai avant il termin da l'examen ed en furma electronica.

La gruppa directiva ha constatà che l'examen da tudestg è cumplainamain valaivel er senza las dumondas derasadas en moda illegala. Perquai n'èn questas dumondas betg vegnidas resguardadas per valitar l'examen. Tenor il stadi actual da las enconuschientschas n'èn naginas scolaras e nagins scolars vegnids dischavantagiads pervia da questa mesira.

L'uffizi per la furmaziun media-superiura examinescha ussa mesiras adattadas per impedir cas sumegliants en l'avegnir.


Infurmaziuns:
Martin Michel, lic. iur., advocat, vicemanader da l'uffizi per la furmaziun media-superiura, tel. 081 254 12 32, 079 204 67 14, e-mail martin.michel@ahb.gr.ch  


Gremi: uffizi per la furmaziun media-superiura
Funtauna: rg uffizi per la furmaziun media-superiura