Il chantun Grischun vul repassar e concretisar ses model directiv pertutgant la vegliadetgna. Per quest intent èn sa scuntradas spezialistas e spezialists da l'administraziun, da federaziuns e d'organisaziuns, gievgia, ils 15 d'avrigl 2010, a Cuira per ina dieta. Ils resultats dals lavuratoris duain vegnir integrads en il nov model directiv pertutgant la vegliadetgna. Il model directiv duai vegnir dà en consultaziun l'onn proxim. La finamira è quella d'elavurar ils princips directivs per concepir ina politica da vegliadetgna progressiva per ils proxims 10 fin 15 onns.

Il model directiv chantunal vertent pertutgant la vegliadetgna datescha da l'onn 1996. El sto vegnir repassà e concretisà. Per quest intent ha il departament da giustia, segirezza e sanadad organisà ils 15 d'avrigl 2010 in lavuratori cun spezialistas e cun spezialists. Circa 30 persunas da differentas organisaziuns statalas e nunguvernamentalas han dà suatientscha a l'invitaziun ed han fatg valair lur enconuschientschas spezialas e lur experientscha pratica a la dieta.

Cuntanscher ina finamira communabla
L'avantmezdi èn stads trais referats d'input sin il program. La cussegliera guvernativa Barbara Janom Steiner ha descrit la situaziun politica da partenza e las finamiras politicas. Ils novs svilups demografics e socials ston vegnir integrads cun repassar il model directiv pertutgant la vegliadetgna. La politica da vegliadetgna na dastga betg vegnir reducida a discussiuns davart las structuras da provediment e davart ils cuntegns en il sectur da la tgira e da l'assistenza. Ella sto avair ina basa pli vasta e sto surpassar ils cunfins da la politica. Il potenzial considerabel da las mesiras per promover la sanadad e la prevenziun sco er la savida e las enconuschientschas enormas da las persunas pli veglias en il chantun Grischun ston vegnir tratgs a niz. Sche la politica da vegliadetgna duai avair success, èsi central che tut ils acturs da la politica da vegliadetgna e da la lavur da vegliadetgna persequiteschian la medema finamira.
Daniel Zindel, teolog e manader da la fundaziun "Gott hilft", ha referì davart il tema "midada da las valurs socialas e vegliadetgna". La schurnalista ed autura dr. Klara Obermüller ha relatà en ses referat davart ils "plaschairs e displaschairs dal vegnir vegl".

En ils lavuratoris dal suentermezdi han las spezialistas ed ils spezialists discutà detagliadamain davart ils novs prinicips directivs e davart ils champs d'agir strategics en la politica da vegliadetgna dal Grischun. La differenta provegnientscha da las spezialistas e dals spezialists ha procurà per ina discussiun animada e plain tensiun, che ha dà infurmaziuns interessantas per l'ulteriura lavur. Bleras participantas e blers participants èn sa declerads pronts da collavurar per concretisar ils princips directivs en las gruppas da lavur e da sustegnair l'uffizi da sanadad en sia ulteriura lavur.

Il nov model directiv duai fixar per ils proxims 10 fin 15 onns ils princips directivs, als quals pon s'orientar ils acturs statals e nunguvernamentals en il chantun Grischun entaifer lur champ da cumpetenza respectiv. En quest connex duain er vegnir definidas mesiras concretas che pon vegnir realisadas ils proxims onns.

Ulteriur proceder
L'uffizi da sanadad ch'è incumbensà da repassar e da concretisar il model directiv pertutgant la vegliadetgna, vegn ad integrar en il sboz las enconuschientschas ch'èn vegnidas obtegnidas en ils lavuratoris. Ultra da quai vegn l'uffizi da sanadad a nominar gruppas da lavur interdisciplinaras che concretiseschan eventualas mesiras sin fundament dals resultats ch'èn vegnids obtegnids en ils lavuratoris. En in'ulteriura fasa duai il nov model directiv pertutgant la vegliadetgna vegnir dà en consultaziun l'onn proxim. Suenter la procedura da rectificaziun vegn la regenza a deliberar il nov model directiv pertutgant la vegliadetgna.


Infurmaziuns:
- cussegliera guvernativa Barbara Janom Steiner, scheffa dal departament da giustia, segirezza e sanadad, tel. 081 257 25 01
- Rudolf Leuthold, manader da l'uffizi da sanadad, tel. 081 257 26 41


Gremi: departament da giustia, segirezza e sanadad
Funtauna: rg departament da giustia, segirezza e sanadad