A chaschun da sia ultima sesida ha la regenza grischuna repartì la dieschma d'alcohol en l'autezza da 627'000 francs. Quests daners vegnan duvrads per projects da prevenziun, per custs da tractament sco er per projects da perscrutaziun e da furmaziun. Ultra da quai ha ella tractà differentas fatschentas da vischnancas sco er deliberà contribuziuns chantunalas ad instituziuns.

Repartì la dieschma d'alcohol
La regenza grischuna ha repartì la dieschma d'alcohol en l'autezza da 627'590 francs or da l'onn da gestiun 2009. Quests daners vegnan duvrads per projects da prevenziun, per custs da tractament sco er per projects da perscrutaziun e da furmaziun. Tenor la lescha federala davart las bavrondas destilladas ston ils chantuns duvrar lur part dal retgav net da l'administraziun federala d'alcohol per cumbatter ils motivs e las consequenzas da l'alcoholissem sco er l'abus da drogas, da narcotics e da medicaments.

Da vischnancas e da regiuns

• Bregaglia: La revisiun totala da la planisaziun locala, concludida da la vischnanca da Bregaglia (anteriuramain Bondo) ils 27 da zercladur 2008, vegn approvada. La revisiun parziala da la planisaziun locala concernent la disposiziun davart las abitaziuns secundaras da la vischnanca da Bregaglia (anteriuramain Stampa), concludida ils 22 da schaner 2009, vegn er approvada.
• Mustér: La revisiun parziala da la planisaziun locala "planisaziun da l'areal Acla da Fontauna" che la vischnanca da Mustér ha concludì ils 19 da schaner 2010 vegn approvada.

Contribuziuns chantunalas a differentas instituziuns

• Manaschament regiunal – contribuziuns 2010: En il rom da la realisaziun da la nova politica regiunala (NPR) da la confederaziun ha il chantun fixà sias contribuziuns dal manaschament regiunal per l'onn 2010. Nov regiuns survegnan contribuziuns en l'autezza totala da 418'500 francs. Las contribuziuns da promoziun sa basan sin cunvegnas da prestaziun e duain gidar a realisar la NPR en moda uschè cmplessiva ed efficazia sco pussaivel en il chantun Grischun.
• Telefericas da Lai SA: Cun resalva da la finanziaziun totala vegn concedì – en il rom da la nova politica regiunala da la confederaziun (NPR) – in credit da 2'000'000 francs a las telefericas da Lai SA per construir da nov l'implant da transport Corn cotschen 1. Ultra da quai vegn garantida ina contribuziun chantunala da 336'679 francs.
• Uniun per plazzas da dimora e da lavur protegidas Engiadina e vals dal sid: A l'uniun per plazzas da dimora e da lavur protegidas Engiadina e vals dal sid vegn concedida ina contribuziun da maximalmain 96'000 francs per cumprar duas plazzas da parcar en la chasa da parcar Bellevue a Samedan.

Projects da vias
La regenza ha approvà totalmain 3'367'000 francs per construir e per sanar ils suandants trajects da vias:
- via dal Bernina: lavurs d'impressari e lavurs da cuvrida, punt a spunda Martin I e II
- via d'Engiadina: lavurs d'impressari e lavurs da cuvrida, Brail – Zernez, Raschitsch


Gremi: regenza
Funtauna: rg chanzlia chantunala dal Grischun