La cumissiun per politica da stadi e strategia dal cussegl grond approvescha l'analisa ch'è vegnida fatga da la regenza sco er la nova lantschada da la NGF grischuna ch'è planisada a partir da l'onn 2012. La cumissiun è da l'avis ch'i dettia anc adina in grond basegn d'agir tar la gulivaziun da finanzas grischuna.

Suenter ch'il pievel aveva refusà la NGF grischuna, ha la regenza fatg in'emprima analisa e discurrì l'ulteriur proceder. Suenter la sessiun d'avrigl dal cussegl grond è la cumissiun per politica da stadi e strategia, ch'è stada la cumissiun predeliberanta dal project da la NGF refusà, sa laschada orientar dal cusseglier guvernativ cumpetent Martin Schmid davart las intenziuns che la regenza ha en quest connex.

La cumissiun approvescha e sustegna l'analisa che la regenza ha fatg sco er la nova lantschada da la NGF grischuna ch'è planisada a partir da l'onn 2012. Ad ella pari impurtant che la nova NGF vegnia accordada cun ils proxims projects da refurma e che las finamiras principalas incontestadas da la NGF refusada vegnian resguardadas en la nova lantschada en moda cunvegnenta.

La cumissiun è unanimamain da l'avis ch'i dettia anc adina in grond basegn d'agir tar la gulivaziun da finanzas grischuna. Incontestada è la necessitad d'ina refurma cumplessiva da la gulivaziun da finanzas. La cumissiun è er da l'avis ch'i stoppian vegnir realisads e terminads en emprima lingia ils projects legislativs currents sco la revisiun da la lescha da scola, la finanziaziun da la tgira e dals ospitals e.u.v. La cumissiun è dentant conscienta ch'i n'è – pervia dals stretgs entretschaments – betg simpel d'adattar ils projects currents a la nova NGF en quai che pertutga lur cuntegn. Igl è dentant indispensabel ch'i vegnia fatg l'emprim per exempel la revisiun totala da la lescha da scola e che la gulivaziun da finanzas vegnia adattada a quella. Per quels motivs beneventass la cumissiun, sche la revisiun da la lescha da scola vegniss suttamessa uschè spert sco pussaivel al cussegl grond. En il decurs da l'onn current vegn il cussegl grond ad avair la chaschun da discutar il rapport da la regenza concernent la refurma dal territori. Ins dastga far quint che quai portia enconuschientschas impurtantas per la concepziun da la nova NGF. Quai che vegn dentant considerà da la cumissiun sco opziun pauc realistica è da spetgar cun la nova lantschada da la NGF fin che la refurma da las structuras territorialas è realisada. L'urari previs da la regenza da lantschar da nov la NGF il pli baud l'onn 2012 para a la cumissiun realistic ed acceptabel.


Infurmaziuns:
Jon Domenic Parolini, president da la cumissiun per politica da stadi e strategia, tel. 079 280 72 92


Gremi: cumissiun per politica da stadi e strategia
Funtauna: cumissiun per politica da stadi e strategia