Il chantun Grischun cuntinuescha speditivamain a sviluppar il project "sinergia" per in nov center d'administraziun a Cuira. L'uffizi da construcziun auta ha fixà ussa il plan da termins per l'ulteriur proceder en connex cun la strategia chantunala d'immobiglias. Per sclerir dumondas avertas duai vegnir realisada ina planisaziun da test fin la fin d'avust. La missiva da construcziun duai esser avant maun fin il december 2010.

En la sessiun da december 2009 ha il cussegl grond tractà il rapport davart la strategia d'immobiglias dal chantun e la realisaziun respectiva planisada a Cuira. Il chantun metta l'accent sin ferms centers regiunals. Er a Cuira duai ina gronda part da l'administraziun chantunala vegnir concentrada en in edifizi nov che duai cuntegnair circa 725 plazzas da lavur. Il cussegl grond ha prendì enconuschientscha dal rapport ed approvà cun ina gronda maioritad la varianta da realisaziun "sinergia".

Suenter questa decisiun positiva vegni cuntinuà en moda speditiva cun il project "sinergia". Igl è previs da realisar ina planisaziun da test en il decurs da quest onn. Cun quella duain vegnir scleridas dumondas ch'èn anc avertas, sco per exempel la conferma dal concept da gestiun general, la cumprova da la realisaziun, l'avertura per il traffic u la realisaziun da las etappas da construcziun. Questa projectaziun furma la basa per eruir pli tard ils custs e per elavurar la missiva da construcziun necessaria per mauns dal cussegl grond. La concurrenza da projects vegn realisada pir suenter ch'il parlament ha approvà la missiva da construcziun. La finala è anc necessaria ina votaziun dal pievel en chaussa.

L'ulteriur plan da termins sa preschenta sco suonda:

• planisaziun da test fin la fin d'avust 2010
• elavuraziun da la missiva da construcziun fin il december 2010
• discussiun en il cussegl grond durant la sessiun d'avrigl 2011
• votaziun chantunala il november 2011
• planisaziun e realisaziun ils onns 2012 fin 2018

"sinergia" – ils fatgs ils pli impurtants en furma concisa
"sinergia" è il project il pli grond ed efficazi da la strategia chantunala d'immobiglias per distgargiar en moda persistenta las finanzas chantunalas. La situaziun actuala a Cuira na cuntenta betg. Il spazi dals edifizis da l'administraziun existents na vegn betg utilisà en moda effizienta. Il basegn da spazi confurm a l'utilisaziun po vegnir garantì mo insuffizientamain da las immobiglias existentas.

La realisaziun da "sinergia" è en tuts reguards pli economica che las sanaziuns indispensablas e charas dals edifizis d'abitar che vegnan duvrads oz da l'administraziun. La grondezza da l'edifizi nov sa drizza tenor il basegn actual. El na furma perquai ni in pregiudizi per in'extensiun da l'administraziun ni per in'ulteriura centralisaziun a Cuira.

Las investiziuns nettas per "sinergia" importan var 50 milliuns francs (il retgav or da la vendita d'atgnas immobiglias è er resguardà). Cun la construcziun da l'edifizi nov per l'administraziun pon vegnir spargnads tranter 1,8 e 2,2 milliuns francs. Las investiziuns nettas vegnan pajadas cumplettamain en 25 onns.

Per la citad da Cuira porscha "sinergia" ina schanza unica. En il center tschertgà vegnan libras immobiglias per abitaziuns e per il mastergn. Las novas utilisadras ed ils novs utilisaders vegnan ad esser in potenzial economic tuttina grond per il mastergn local. Igl è da quintar che quellas e che quels vegnan a dar ulteriurs impuls al center da Cuira er durant las uras marginalas e la saira.

L'edifizi nov per l'administraziun en il punct central dal svilup economic a Cuira vest è posiziunà en moda ideala e favuraivla per las utilisadras e per ils utilisaders. Il lieu distgargia il traffic en il center ed è bain cuntanschibel cun ils meds da transport publics.


Infurmaziuns:
Markus Dünner, architect chantunal, uffizi da construcziun auta dal Grischun, telefon 081 257 36 31


Gremi: uffizi da construcziun auta
Funtauna: rg uffizi da construcziun auta