Dapi il cumenzament da december 2009 han ins pudì constatar pliras giadas ch'igl ha ina ludra en la vischinanza da las ovras electricas La Punt a Domat. La preschientscha da quest animal ha pudì vegnir cumprovada cun agid da la surveglianza automatica da video a la stgala da peschs da l'ovra electrica.

Ils films subaquatics da l'uffizi da chatscha e pestga mussan senza dubi ch'igl animal observà è ina ludra d'ina lunghezza da 70 cm.
La ludra, ch'existiva oriundamain en l'entira Svizra, è svanida en nossas regiuns. La cumprova segirada d'ina ludra selvadia en il Rain alpin fiss perquai bunamain ina sensaziun. Ils ultims onns han pudì vegnir constatads en Svizra sulettamain animals ch'eran fugids d'allevaments. L'onn passà è vegnida observada e pigliada ina ludra pitschna al lai da Murten.

Per il mument na pon ins anc betg dir, sch'i sa tracta tar la ludra observada d'in individi immigrà en moda natirala u d'in exemplar ch'è scappà d'in allevament. Pir la prelevaziun e l'analisa dal material genetic (excrements, pail) pon furnir las infurmaziuns relevantas. Las proximas colonias da ludras sa chattan en Baviera ed en il Tirol.
Fin ussa n'èsi betg stà pussaivel d'observar la ludra ordaifer l'aua. L'uffizi da chatscha e pestga supplitgescha la populaziun d'annunziar eventualas observaziuns.


Infurmaziuns:
- dr. Georg Brosi, uffizi da chatscha e pestga, tel. 081 257 38 92
- Hannes Jenny, biolog da selvaschina, uffizi da chatscha e pestga, tel. 081 257 38 92
- dr. Marcel Michel, biolog da peschs, uffizi da chatscha e pestga, tel. 081 257 38 94


Infurmaziun per las medias:
Material fotografic e da video chattais Vus sin la pagina d'internet da l'uffizi da chatscha e pestga sut la suandanta adressa: http://www.jagd-fischerei.gr.ch/aktuelles/grossraubtiere/  


Gremi: uffizi da chatscha e pestga
Funtauna: rg uffizi da chatscha e pestga