La regenza grischuna ha concludì a chaschun da sia ultima sesida ch'il Grischun sa participeschia al svilup dal nov plan d'instrucziun 21. Per il Grischun duain en quest connex vegnir elavurads plans d'instrucziun supplementars per las linguas. Ultra da quai ha la regenza adattà a la chareschia las taxas da las patentas da chatscha.

Il Grischun sa participescha al plan d'instrucziun 21
Il chantun Grischun sa participescha al svilup dal nov plan d'instrucziun 21 per la Svizra tudestga. En quest connex duain vegnir elavurads per il chantun plans d'instrucziun supplementars per las linguas. Quai ha concludì la regenza grischuna. Ella ha autorisà il departament d'educaziun, cultura e protecziun da l'ambient da suttascriver la cunvegna da project dal plan d'instrucziun 21.
Perquai che las regulaziuns per l'instrucziun da linguas estras e per l'instrucziun da linguas da scola en il Grischun divergeschan per part dals ulteriurs chantuns tudestgs e dals ulteriurs chantuns bilings ston tschertas parts dals plans d'instrucziun vegnir sviluppadas exclusivamain per il chantun Grischun. La regenza ha prendì enconuschientscha dal concept correspundent davart il project parzial dal Grischun, cun il qual i duain vegnir sviluppads plans d'instrucziun supplementars per il Grischun. Uschia poi vegnir garantì ch'il Grischun survegn in plan d'instrucziun 21 integral che tegna quint dals basegns dal Grischun tudestg, talian e rumantsch.
Cun il plan d'instrucziun 21 realiseschan ils chantuns participads l'artitgel da furmaziun da la constituziun federala, tenor il qual las finamiras da la scola ston vegnir armonisadas. Ils 18 da mars 2010 han las directuras ed ils directurs chantunals da l'educaziun publica da las regiuns tudestgas da la CDEP deliberà la basa per in plan d'instrucziun che vegn sviluppà ensemen per 21 chantuns tudestgs e plurilings. Il project d'elavuraziun dal plan d'instrucziun 21 cumenza l'atun 2010 e dura fin la primavaira 2014. Ils chantuns han er vinavant la pussaivladad da fixar lur urari e da l'adattar en tscherts secturs a las relaziuns chantunalas. La deliberaziun e l'approvaziun definitiva dal plan d'instrucziun suttastat a las reglas chantunalas respectivas.

Adattà a la chareschia las taxas da las patentas da chatscha
Il chantun Grischun adatta las taxas per las patentas da la chatscha auta e da la chatscha bassa a la chareschia. Quai ha concludì la regenza grischuna e mess en vigur las adattaziuns correspundentas per il 1. da zercladur 2010.
Per chatschadras e per chatschaders cun domicil en il chantun importa la taxa da la patenta da chatscha auta da nov 690 francs (enfin ussa: 683 francs) e da chatscha bassa 278 (275 francs). L'ultima giada èn las taxas da las patentas da chatscha vegnidas adattadas la primavaira 2008. La chareschia ch'è s'accumulada dapi lura importa 1 pertschient. La regenza resguarda in augment da las taxas da patenta en questa dimensiun sco giustifitgà e motivà.

Da vischnancas e da regiuns

• Tujetsch: La regenza approvescha il project "protecziun cunter crudada da crappa Sontga Brida" da la vischnanca da Tujetsch. Als custs vegnan garantidas contribuziuns da maximalmain 539'500 francs.
• Zernez: Il project "rempars cunter scuflads en il Laviner dal Sbrudà" sin il territori da la vischnanca da Zernez vegn approvà e sustegnì cun ina contribuziun da maximalmain 120'000 francs.
• Lantsch: La revisiun totala da la lescha da construcziun da la vischnanca da Lantsch dals 25 d'avust 2009 vegn approvada cun ina resalva concernent la contingentaziun da la construcziun d'abitaziuns secundaras.
• Vaz: La revisiun parziala da la planisaziun locala concernent il center da purs, ch'è vegnida concludida ils 24 da schaner 2010 da la vischnanca da Vaz, vegn approvada.

Projects da vias
La regenza ha approvà totalmain 4'200'000 francs per construir e per sanar ils suandants trajects da vias:
- via taliana: lavurs da cuvrida Panaduz – funtauna minerala; lavurs d'impressari Lubianeira – Poent
- via da Stierva: lavurs d'impressari Plazzatsch – Val Mulegn
- via da Tarasp: lavurs da stuppadira e da cuvrida da la punt d'En


Gremi: regenza
Funtauna: rg chanzlia chantunala dal Grischun