En vista a la proxima sessiun da zercladur è la cumissiun per ambient, traffic ed energia sa fatschentada cun trais missivas che stattan en connex ina cun l'autra: la revisiun da la lescha davart l'assicuranza d'edifizis, il relasch d'ina lescha davart la protecziun cunter incendis cun l'aboliziun da l'ordinaziun davart la polizia da fieu sco er la revisiun parziala da la lescha davart l'indemnisaziun da donns elementars betg assicurabels. La cumissiun propona al cussegl grond d'approvar ils projects.

Per preparar ils trais projects ha la cumissiun dal cussegl grond per ambient, traffic ed energia, che vegn presidiada dal president da la cumissiun Christoph Jaag, fatg in'examinaziun preliminara dals sbozs da lescha correspundents da la regenza e deliberà quels per mauns dal cussegl grond. A la sesida è er sa participada la cussegliera guvernativa Barbara Janom Steiner.
 
La cumissiun è da l'avis che la lescha davart l'assicuranza d'edifizis, che datescha da l'onn 1970, saja da princip sa cumprovada. Pervia da diversas circumstanzas sto ella dentant tuttina vegnir revedida: Considerond la constituziun chantunala ston disposiziuns impurtantas vegnir regladas en ina lescha en il senn formal. Differentas disposiziuns impurtantas sa chattan actualmain en relaschs d'in stgalim legislativ inferiur e ston perquai vegnir regladas en la lescha davart l'assicuranza d'edifizis. Tscherts puncts ston er vegnir adattads materialmain a las relaziuns actualas en ils fatgs d'assicuranza. Las disposiziuns davart la prevenziun e davart il cumbat da donns da fieu vegnan transferidas en la legislaziun davart la protecziun cunter incendis. In basegn d'agir legislativ exista er en il sectur da la polizia da fieu e dals pumpiers. L'ordinaziun vertenta davart la polizia da fieu e las disposiziuns executivas respectivas da la regenza cuntegnan numerusas disposiziuns che ston – pervia da lur impurtanza – vegnir transferidas sin il stgalim da la lescha. Vitiers vegn ch'ils fatgs da pumpiers èn sa midads massivamain ils ultims decennis e ch'i sto perquai vegnir tegnì quint da quest fatg sin plaun legislativ. Ils secturs dals pumpiers e da la polizia da fieu vegnan excorporads e reglads en la nova lescha davart la protecziun cunter incendis.
 
Ultra d'ulteriuras adattaziuns pli pitschnas en quest sectur approvescha la cumissiun er unanimamain il fatg che las prestaziuns da la cassa per donns elementars betg assicurabels da bains immobigliars duajan vegnir amplifitgadas tras la revisiun parziala da la lescha davart l'indemnisaziun da donns elementars betg assicurabels.
 
Suenter avair tractà detagliadamain ils projects ha la cumissiun concludì unanimamain, senza propostas da midadas, da proponer al cussegl grond d'acceptar las propostas da la regenza.


Infurmaziuns:
- Ernst Sax, pledader da la CATE per la lescha davart l'assicuranza d'edifizis, tel. 076 433 43 71
- Markus Clavadetscher, pledader da la CATE per la lescha davart la protecziun cunter incendis, tel. 079 254 31 00
- Markus Stoffel, pledader da la CATE per la lescha davart l'indemnisaziun da donns elementars betg assicurabels, tel. 076 517 08 22


Gremi: cumissiun per ambient, traffic ed energia
Funtauna: rg cumissiun per ambient, traffic ed energia