Cun il project grischunBIKE vul il Grischun daventar la regiun turistica la pli impurtanta en il sectur dals velos da muntogna. En collavuraziun cun represchentantas e cun represchentants dal turissem e da l'economia ha il chantun laschà elavurar in concept correspundent. Quel duai vegnir realisà ils proxims onns cun expensas totalas da circa 3.6 milliuns francs.

Tenor il concept directiv per l'economia dal Grischun 2010 duai il chantun Grischun daventar la regiun da vacanzas principala da las Alps cun products turistics d'auta qualitad. L'uffizi per economia e turissem sco er il post spezialisà per il traffic betg motorisà da l'uffizi da construcziun bassa han lantschà in project cun la finamira da posiziunar il Grischun sco purschider principal da recreaziun activa en la natira cun las disciplinas velo da muntogna, viandar, chaminar nordic e viandar d'enviern sco er cun ulteriuras activitads da la mobilitad cun forza umana (Human Powered Mobility).

En in emprim pass fa in biro extern in concept concret per la disciplina"velo da muntogna". En intervistas cun las destinaziuns turisticas e cun autras purtadras e purtaders da prestaziuns turisticas èn vegnidas evaluada la situaziun actuala, definidas finamiras e proponidas mesiras concretas. Cun totalmain 3.6 milliuns francs inclusiv las atgnas prestaziuns da las parts participadas duain vegnir realisadas circa 30 mesiras en ils onns 2010 fin 2013. Ina rolla impurtanta giogan standards da qualitad liants ed instruments standardisads che permettan a las singulas destinaziuns da sviluppar vinavant lur purschidas specificas sin in standard aut e da las vender sut il label "Grischun".

Il concept ha chattà in resun positiv a chaschun da la vasta consultaziun ch'è vegnida fatga en il chantun. La fin da mars ha la regenza approvà il project ch'è vegnì inoltrà dal post spezialisà per il traffic betg motorisà ed ha deliberà ina contribuziun da tut en tut maximalmain 1.5 milliuns francs or dals meds finanzials da la nova politica regiunala da la confederaziun. La fundaziun grischuna per innovaziun, svilup e perscrutaziun ha garantì per entant 500'000 francs. Ina ulteriura contribuziun substanziala vegn empermessa, sch'il project sa sviluppa cun success. In cussegl consultativ, dal qual fan part commembras e commembers da l'economia turistica sco er in represchentant da las organisaziuns grischunas da l'ambient, è vegnì installà da l'uffizi per economia e turissem e vegn ad accumpagnar stretgamain quest project.

Sut la direcziun dal post spezialisà per il traffic betg motorisà è quest project vegnì lantschà en il fratemp. En in emprim pass vegn ina direcziun da project externa a priorisar las mesiras per l'emprima etappa da realisaziun 2010 - 2011 e vegn a las elavurar alura detagliadamain cun gruppas da lavur che sa cumponan specificamain tenor las mesiras. Las emprimas realisaziuns concretas avessan da pudair vegnir fatgas gia per la stagiun da stad 2011.


Infurmaziuns:
- Peter Stirnimann, uffizi da construcziun bassa, responsabel per las medias e manader dal post spezialisà per il traffic betg motorisà, tel. 081 257 37 11
- Michael Caflisch, vicemanader da l'uffizi per economia e turissem, tel. 081 257 23 73


Gremi: uffizi da construcziun bassa
Funtauna: rg uffizi da construcziun bassa