A chaschun da sia ultima sesida ha la regenza grischuna concludì da stgaffir a Scuol in nov center administrativ regiunal. Ultra da quai ha ella formulà sia posiziun davart la revisiun da la lescha federala davart la metrologia.

Planisà in nov center administrativ regiunal a Scuol
Il chantun Grischun planisescha da concentrar ils posts da servetsch chantunals da l'Engiadina bassa en in lieu a Scuol. La regenza grischuna ha concludì da stgaffir in nov center administrativ regiunal.
La strategia chantunala d'immobiglias ha la finamira da stgaffir nov centers regiunals ch'èn repartids en l'entir chantun. A Landquart, a Glion ed a Roveredo èn tals gia en funcziun ed els èn sa cumprovads en la pratica. In center regiunal vegn gist construì a Tusaun e vegn surdà il settember 2011 a las utilisadras ed als utilisaders.
Sco proxim duai ussa vegnir realisà in center en la vischnanca da Scuol. En tut sis posts da servetsch chantunals sco er l'uffizi chantunal da polizia da fieu, ch'èn sparpagliads oz en tschintg differents lieus, duain vegnir concentrads en in nov edifizi d'administraziun cun var 25 plazzas da lavur. Tar quests posts da servetsch tutgan biros da l'uffizi da stimaziun, dal servetsch psicologic da scola, da la cussegliaziun da professiun e da carriera respectivamain dal center d'infurmaziun professiunala, da l'uffizi forestal, da l'uffizi dal servetsch social sco er da la polizia chantunala.
Ils posts da servetsch duain prender en locaziun biros en in edifizi nov planisà dal center da la posta e dal coop al Stradun. Quest edifizi pudess vegnir realisà a partir da l'onn 2011, uschia ch'el pudess vegnir retratg l'atun 2013.

La regenza va d'accord cun la revisiun da la lescha federala davart la metrologia
La regenza grischuna sustegna la revisiun parziala planisada da la lescha federala davart la metrologia. Da princip n'ha ella naginas objecziuns cunter la transfurmaziun da l'uffizi federal da metrologia (METAS) en in institut da dretg public, tant pli ch'ils chantuns n'èn betg pertutgads directamain da questa midada. Quai menziunescha la regenza en sia resposta da consultaziun a la confederaziun.
L'uffizi federal da metrologia duai daventar pli independent per pudair ademplir sias incumbensas en moda pli effizienta. En vista a las libertads d'interprendider planisadas dal METAS è la regenza dentant da l'avis ch'i saja impurtant da formular prescripziuns e cundiziuns generalas cleras, per che la metrologia legala possia vegnir tegnida sin in nivel aut er en l'avegnir. La regenza è sceptica en quai che concerna l'ulteriura liberalisaziun da la metrologia ubain in'eventuala avertura dal monopol en la metrologia.

Da vischnancas e da regiuns

• Tavau: La regenza approvescha il contract tranter il chantun Grischun e la vischnanca da Tavau per laschar surpigliar la polizia chantunala dal Grischun incumbensas da la polizia communala.
• Almen: Il project "Via da guaud Mühle – Tscheins" da la vischnanca d'Almen vegn approvà e sustegnì cun ina contribuziun da maximalmain 291'100 francs.
• S-chanf: Per il project "Lavuratori communal da S-chanf" da la vischnanca da S-chanf vegn garantida ina contribuziun da maximalmain 512'000 francs.
• Sumvitg: Il project "Lavuratori communal da Sumvitg" da la vischnanca da Sumvitg vegn subvenziunà cun maximalmain 305'000 francs.
• Vrin: A la corporaziun d'alp Diesrut vegn garantida ina contribuziun chantunala da maximalmain 93'000 francs als custs per sanar il provediment d'aua, ils bigls sco er la Tegia Sut.
• Rueun: La revisiun parziala da la planisaziun locala da la vischnanca da Rueun dals 4 da december 2009 vegn approvada.

 
Contribuziuns chantunalas a differentas instituziuns

• Chasa da persunas attempadas Valragn "Glienda" ad Andeer: A la chasa da persunas attempadas Valragn "Glienda" ad Andeer vegn garantida ina contribuziun chantunala d'investiziun dad 1'280'000 francs per stgaffir otg letgs da tgira supplementars.
• Pro senectute dal Grischun: Il nov contract da prestaziun per ils onns 2010 fin 2013 tranter il chantun Grischun e la Pro senectute dal Grischun vegn approvà. La pauschala e l'indemnisaziun che sa drizza tenor la prestaziun importan en tut maximalmain 335'000 francs per onn.
• Federaziun forestala dal Grischun SELVA: La federaziun forestala dal Grischun SELVA survegn ina contribuziun chantunala da 53'000 francs per l'onn 2010.
• Tgira da monuments: Per restaurar ina chasa d'abitar a Schluein vegn pajada ina contribuziun maximala da 100'000 francs.

Projects da vias
La regenza ha approvà totalmain 14'492'000 francs per construir e per sanar ils suandants trajects da vias:
- via d'Engiadina: lavurs d'impressari, punt dal Flaz, Schlarigna – Punt Muragl; lavurs d'impressari e da cuvrida, Giarsun – Ardez vest
- via da Favugn: lavurs d'impressari e da cuvrida, Favugn
- via dal Güglia: lavurs d'impressari, sviament da Silvaplauna
- via da la Lumnezia: lavurs d'impressari Quadras – Nislas
- via da Val S. Pieder: lavurs d'impressari, Bucarischuna – Steintöbeli


Gremi: regenza
Funtauna: rg chanzlia chantunala dal Grischun