La cumissiun per sanadad e fatgs socials dal cussegl grond ha predeliberà las missivas da la regenza tar la revisiun parziala da la lescha per promover la tgira da persunas malsaunas sco er tar la lescha introductiva tar la lescha davart ils products terapeutics e recumonda al cussegl grond d'acceptar tuts dus projects.

Sut il presidi dal deputà Carlo Portner ha la cumissiun dal cussegl grond per sanadad e fatgs socials (CSF) predeliberà en duas sesidas las missivas da la regenza tar la revisiun parziala da la lescha per promover la tgira da persunas malsaunas e tar il relasch da la lescha introductiva tar la lescha davart ils products terapeutics per mauns dal cussegl grond. A las sesidas è er sa participada la cussegliera guvernativa Barbara Janom Steiner.

La revisiun parziala da la lescha chantunala per promover la tgira da persunas malsaunas è necessaria, perquai che la lescha federala davart la reordinaziun da la finanziaziun da la tgira entra en vigur per il 1. da schaner 2011. La CSF ha examinà detagliadamain las midadas da la lescha che la regenza ha proponì. En quest connex èn las singulas disposiziuns da la revisiun parziala vegnidas discutadas per part en moda cuntraversa ed il cussegl grond vegn a stuair votar davart in pèr propostas da midada da la cumissiun. Tuttina è la CSF arrivada unanimamain a la conclusiun da recumandar al cussegl grond d'acceptar il project ch'è vegnì tractandà per la sessiun d'avust 2010. La finala sa tracti da realisar dretg federal obligatoric che lascha als chantuns tuttavia mo pauca libertad per relaschar atgnas regulaziuns.

Er il relasch d'ina lescha introductiva tar la lescha davart ils products terapeutics pertutga in'adattaziun da las disposiziuns chantunalas al dretg federal surordinà. L'intent è la protecziun da la sanadad en connex cun il diever da medicaments. Per quest intent fixescha il chantun en ses champ da cumpetenza regulaziuns per manaschis da medicaments en il commerzi en detagl sco apotecas e drogarias publicas, dentant er sco apotecas privatas da persunas medicinalas, dals ospitals e da las chasas da tgira. Betg integrada en la lescha introductiva tar la lescha davart ils products terapeutics na vegn la consegna da medicaments tras medias e tras medis (l'uschenumnada autodispensaziun). Quella vegn reglada en la lescha davart ils fatgs da sanadad dal chantun Grischun che sa chatta actualmain en la consultaziun. La CSF propona unanimamain al cussegl grond d'entrar en il project e da l'approvar. Il sboz da la lescha da la regenza ha chaschunà ina discussiun en la cumissiun mo en quai che reguarda la disposiziun transitorica per las permissiuns existentas. Qua ha ina minoritad da la cumissiun giavischà che la valaivladad da las permissiuns existentas n'importia betg dus, mabain tschintg onns suenter l'entrada en vigur da la lescha. Er questa fatschenta vegn il cussegl grond a tractar en la sessiun d'avust 2010.


Infurmaziuns:
Carlo Portner, president da la cumissiun per sanadad e fatgs socials, tel. 081 253 66 55


Gremi: cumissiun per sanadad e fatgs socials
Funtauna: rg cumissiun per sanadad e fatgs socials