Suenter ch'il project da la NGF è vegnì refusà, duai ina pitschna revisiun parziala da la lescha da taglia stgaffir la basa per transferir – sco ch'il cussegl grond ha concludì – l'incassament da la taglia a la funtauna da las vischnancas al chantun. La regenza grischuna ha deliberà la missiva correspundenta. Cun questa chaschun vegnan differentas disposiziuns da la lescha da taglia adattadas a las novaziuns dal dretg fiscal federal u a la giurisdicziun pli nova dal tribunal federal. Il parlament vegn a tractar questa fatschenta en la sessiun d'october.

Per lavurantas estras e per lavurants esters senza permissiun da domicil sto la patruna u il patrun deducir la taglia a la funtauna e far giu quint cun la vischnanca da domicil respectiva da la lavuranta u dal lavurant. La procedura duai vegnir centralisada e simplifitgada tras il sustegn da l'informatica. Areguard la taglia a la funtauna po la patruna u il patrun da nov far giu quint cun il chantun per tut las collavuraturas e per tut ils collavuraturs ed i vegnan a star a disposiziun interfatschas electronicas che simplifitgeschan ulteriuramain quest process. L'incassament da la taglia a la funtauna tras il chantun è gia stà l'object da la NGF grischuna e n'è per gronda part betg vegnì contestà en quest project, tant a chaschun da la consultaziun sco er a chaschun da las debattas parlamentaras.

Las taglias sin las entradas per la confederaziun, per il chantun e per las vischnancas vegnan inditgadas en la medema decleraziun da taglia e vegnan suttamessas communablamain a la taglia. Quest parallelissem pretenda sche pussaivel medemas regulaziuns legalas, uschia che la lescha chantunala da taglia duai vegnir adattada cun questa chaschun a las novaziuns dal dretg fiscal federal. Quai pertutga la deducziun per contribuziuns da commembranza e per donaziuns a partidas politicas sco er il nov concept da la deducziun per la tgira d'uffants.

Revisiun areguard las iertas anticipadas ch'èn vegnidas retratgas tenor il dretg vegl
Ultra da quai sto il chantun adattar en la lescha da taglia las iertas anticipadas ch'èn vegnidas retratgas tenor il dretg vegl. La dretgira administrativa aveva decidì il matg 2009 che la lescha da taglia, la quala vala a partir da l'onn 2008, na cuntegnia betg ina basa legala suffizienta per suttametter a la taglia las iertas anticipadas ch'èn vegnidas retratgas avant l'onn 2001. Silsuenter n'è il tribunal federal betg entrà il matg 2010 en in recurs correspundent da la regenza cunter questa decisiun. Fin il mument dal verdict da la dretgira administrativa èn dentant vegnids suttamess gia blers cas cun vigur legala a la taglia. Per cuntanscher in tractament giuridicamain egual, duain questas imposiziuns vegnir revedidas, quai vul dir abolidas. La nova regulaziun duai permetter a l'administraziun da taglia da restituir cun tschains ils debits fiscals ch'èn gia vegnids pajads. Quai pretenda ina incumbensa ch'è vegnida acceptada dal cussegl grond e che sto vegnir realisada qua. La realisaziun ha per consequenza ch'i resultan entradas pli pitschnas da ca. 5.85 milliuns francs. Quests daners ha il chantun gia reservà en il quint 2009.

L'imposiziun economica dubla da taglia da l'acziunaria u da l'acziunari e da la societad anonima vegn mitigiada en il dretg vertent en connex cun participaziuns qualifitgadas tant areguard la taglia sin las entradas sco er areguard la taglia sin la facultad. Il tribunal federal ha qualifitgà il fatg, che la taglia sin la facultad vegn mitigiada, sco in fatg cuntrari al dretg federal. Quai pretenda che la disposiziun correspundenta sto vegnir stritgada. Las entradas supplementaras che resultan da quai vegnan duvradas per ina leva reducziun da la tariffa maximala da la taglia sin la facultad.

Cun excepziun da las disposiziuns davart la taglia a la funtauna duain las midadas entrar en vigur gia per il 1. da schaner 2011, sch'i na vegn fatg nagin referendum.


Infurmaziuns:
- cusseglier guvernativ dr. Martin Schmid, schef dal departament da finanzas e vischnancas,
tel. 081 257 32 01
- Urs Hartmann, manader da l'administraziun da taglia, tel. 081 257 33 24


Gremi: regenza
Funtauna: rg chanzlia chantunala dal Grischun