La regenza grischuna ha tschernì Beat Eberle da 50 onns sco nov cumandant da polizia. El vegn a surpigliar il commando da la polizia chantunala dal Grischun il 1. da schaner 2011.

Beat Eberle, domicilià a Flumserberg-Saxli, è vegnì nominà da la regenza sco nov cumandant da la polizia chantunala dal Grischun. Eberle, annada 1960, ha s'acquistà la patenta d'advocat suenter il studi da giurisprudenza a Son Gagl ed a Berna. Alura ha el lavurà tranter auter sco uffizier da polizia tar la polizia chantunala da Sviz, da 1997 fin 2000 sco schef dal stab e da la polizia criminala, da 2000 fin 2002 sco cumandant ad interim. Dapi 2007 lavura il militar professiunal e colonel en il stab general sco cumandant dal center da cumpetenza per engaschaments da promoziun da la pasch a l'exteriur (SWISSINT). Avant era el cumandant da la SWISSCOY en il Cosovo, ha servì sco adet militar en Svezia ed ha cumandà la polizia militara territoriala.

Eberle è il successur dal cumandant da polizia da blers onns, dr. Markus Reinhardt, ch'è mort ils 26 da schaner 2010. El vegn a surpigliar sia funcziun il 1. da schaner 2011. Il cumandant da polizia ha la responsabladad da manar la polizia chantunala grischuna cun sias passa 400 collavuraturas e collavuraturs.


Infurmaziuns:
cussegliera guvernativa Barbara Janom Steiner, scheffa dal departament da giustia, segirezza e sanadad, tel. 081 257 25 01


Gremi: regenza
Funtauna: rg chanzlia chantunala dal Grischun




 
Beat Eberle, il nov cumandant da la polizia chantunala dal Grischun.