Ils presidents da las vischnancas tranter S­chanf e Scuol, che cunfineschan cun il parc naziunal, èn vegnids infurmads pli detagliadamain d'emprim maun davart il svilup da la biosfera "Val Müstair – parc naziunal" e davart la decisiun da l'UNESCO dals 2 da zercladur 2010. Las infurmaziuns èn vegnidas dadas tras represchentants da la confederaziun e tras ils posts chantunals spezialisads. Sco resultat principal da l'occurrenza han ils represchentants da las vischnancas demussà lur prontezza generala d'entrar en il process per ademplir las cundiziuns da l'UNESCO fin la fin da l'onn 2013.

Concretamain sa tracti d'endrizzar en questas vischnancas ina zona da tgira nuninterrutta che cunfinescha cun la zona centrala (parc naziunal svizzer). Quai per pudair ademplir tut las pretensiuns che valan per reservats da biosfera da l'UNESCO. Sco ch'ils represchentants da la confederaziun e dal chantun han explitgà, vegnan facticamain ademplidas gia oz las cundiziuns da l'UNESCO. Cun las zonas per la protecziun da la cuntrada ch'èn gia en vigur po la realisaziun da las finamiras d'ina zona da tgira numnadamain vegnir garantida senza problems.

Per la procedura da decisiun sin plaun communal dovri dentant anc scleriments pli profunds ed ulteriuras infurmaziuns. Quellas vegnan messas a disposiziun proximamain da l'uffizi federal d'ambient e dals posts chantunals spezialisads.


Infurmaziuns:
- Andreas Cabalzar, uffizi per la natira e l'ambient dal Grischun, tel 081 257 29 31
- Bruno Stephan Walder, uffizi federal d'ambient, tel. 079 312 92 59


Gremi: uffizi per la natira e l'ambient
Funtauna: rg uffizi per la natira e l'ambient