In onn suenter che la restauraziun externa da la chasa grischa a Cuira è terminada, cumpara in guid d'architectura davart la sedia da la regenza grischuna. La publicaziun "Das neue Gebäu in Chur", che po vegnir cumprada a partir d'immediat en las librarias, è l'emprim numer d'ina retscha davart monuments architectonics grischuns ch'è vegnida iniziada da la tgira chantunala da monuments.

L'anteriura chasa signurila en la Reichsgasse a Cuira serva dapi la fundaziun dal chantun l'onn 1803 sco sedia da la regenza. Il "Neues Gebäu" è vegnì construì l'onn 1752 da l'uffizier Andreas von Salis, in descendent dals von Salis da Soglio. Ensemen cun il "Altes Gebäu" da ses cusrin Peter von Salis ha el mess il cuntrapunct urban a la retscha dals edifizis rurals dals von Salis il 18. tschientaner. Cun sia cumparsa ritga a l'intern – che correspunda dal tuttafatg a sia classa sociala – e cun sia apparientscha subtila vers anora è il "Neues Gebäu" in exempel tipic per ils edifizis da la classa superiura grischuna da quel temp. Oz vala il "Neues Gebäu" senza dubi sco in dals edifizis ils pli impurtants dal temp dal rococo sin terren grischun.

La restauraziun externa che ha gì lieu l'onn passà è stada la chaschun per la tgira chantunala da monuments da prender per mauns ina publicaziun davart quest edifizi. Cun texts e cun maletgs preschenta il nov guid d'architectura las differentas localitads fascinantas da l'edifizi. Quai vala er per la sala da la regenza en il 2. plaun da l'edifizi, nua ch'i vegnivan er tegnidas fin l'onn 1878 las sesidas dal cussegl grond. La publicaziun cumpiglia tut en tut 40 paginas. La regenza grischuna ha sustegnì l'ediziun da la publicaziun cun meds finanzials dal fond da lottaria.

Team da redacziun cumpetent
Per elavurar il cuntegn ha pudì vegnir engaschà in team da redacziun cumpetent: cooperà han Ursula Jecklin, Diego Giovanoli e Marcus Casutt. L'istoricra dr. fil. Ursula Jecklin ha manà l'archiv da la citad da Cuira ils onns 1977 fin 2006. Ella ha redigì differentas publicaziuns davart l'istorgia da la citad da Cuira e davart l'istorgia grischuna da las dunnas e da las schlattainas. Diego Giovanoli è stà durant blers onns collavuratur da la tgira da monuments dal Grischun. Dapi l'onn 2001 lavura el sco perscrutader e publicist independent. El ha redigì numerusas publicaziuns davart ils abitadis e davart ils edifizis en il Grischun. L'istoricher d'art lic. fil. Marcus Casutt è tgirader da monuments dal chantun Grischun.

Emprim numer da la nova retscha davart monuments architectonics grischuns
Il guid d'architectura cun il titel "Das Neue Gebäu in Chur" è l'emprim numer d'ina nova retscha davart monuments architectonics grischuns ch'è vegnida iniziada da la tgira da monuments dal Grischun. Cun ses format pitschen porscha il guid pratic la pussaivladad da preschentar edifizis particulars dal chantun en furma monografica. Las publicaziuns ch'èn planisadas en libra successiun sa drizzan a la populaziun indigena, ma er als giasts dal chantun.
Il nov guid d'architectura po vegnir cumprà a partir d'immediat per 9.– francs tar la tgira da monuments u en las librarias.

Marcus Casutt, Diego Giovanoli, Ursula Jecklin: Das Neue Gebäu in Chur. Das Regierungsgebäude des Kantons Graubünden, genannt "Graues Haus", Cuira 2010, ISBN: 978-3-9523369-7-7.


Infurmaziuns:
Marcus Casutt, tgirader chantunal da monuments, tel. 081 257 27 91


Gremi: uffizi da cultura
Funtauna: rg uffizi da cultura