La regenza grischuna ha prendì enconuschientscha d'in nov studi davart ristgas e privels per scolaras e per scolars en l'internet. Ils resultats dal studi ch'il chantun ha laschà far duain vegnir resguardads en l'avegnir tar la scolaziun e tar la furmaziun supplementara da las persunas d'instrucziun. Dal rest è la regenza pronta da sustegnair cun ina contribuziun da 600'000 francs il mantegniment da las restanzas da la curt roiala dal temp medieval tempriv a Zizers. La finala ha la regenza mess en vigur ina nova ordinaziun chantunala davart l'aviatica.

Preschentà in studi davart ils privels per scolaras e per scolars en l'internet
La scola populara duai vegnir sensibilisada per las ristgas ed ils privels per scolaras e per scolars en l'internet. La regenza grischuna ha prendì enconuschientscha d'in studi correspundent ch'il chantun ha laschà far. La scola auta da pedagogia dal Grischun duai resguardar en l'avegnir per la scolaziun e per la furmaziun supplementara da las persunas d'instrucziun ils resultats dal studi che mussan differentas pussaivladads d'intervenziun.
Per pudair trair a niz en moda optimala las schanzas dal medium internet che sa sviluppa fitg svelt, èsi impurtant tant per las persunas cun la pussanza dals geniturs sco er per ils giuvenils d'enconuscher a temp las ristgas ed ils privels ch'èn colliads cun l'applicaziun da l'internet. Il studi che l'uffizi per la scola populara ed il sport ha laschà far il post da perscrutaziun per dretg d'infurmaziun da l'universitad da Son Gagl examinescha las differentas ristgas ed ils differents privels en l'internet. Latiers tutgan en spezial ils secturs "ristgas da segirezza", "violenza ed agressiun corporala", "periclitaziun da la sfera privata" sco er "violaziun dals dretgs d'autur". Il studi concluda che mintga uffant ubain mintga giuvenil è da princip exponì en moda passiva u activa, sapientivamain u senza savair cun effects pli u main gravants als privels en l'internet. En quest connex na sa lascha betg percepir in muster unitar da periclitaziun. La varietad dals aspects negativs – da la dependenza dal gieu sur cyberbullying fin al consum da pornografia ed il barat illegal da musica – è gronda.
En vista a la prevenziun, al scleriment ed a la promoziun da la cumpetenza da medias mussa il studi ina vasta paletta da pussaivladads d'intervenziun. En quest connex n'èn betg mo dumandads ils giuvenils e las persunas d'instrucziun, mabain er ils geniturs, las politicras ed ils politichers sco er ils purschiders da servetschs. Tenor il studi è il clom evident per scumonds darar adequat ed efficazi en il mund digital dals process savens nuncontrollabels. Empè da quai vegn pretendì in instrumentari da differentas mesiras tecnicas u da la pedagogia da medias che ston vegnir adattadas a las pretensiuns respectivas sco er als meds organisatorics e finanzials.
Il studi "Ristgas e privels en l'internet per scolaras e scolars da la scola populara" vegn publitgà sin la pagina d'internet da l'uffizi per la scola populara ed il sport sut www.avs.gr.ch. Pervia da l'impurtanza dal studi per l'entira societad na vegn quel betg mo mess a disposiziun a la scola auta da pedagogia dal Grischun, mabain er a l'uniun "magistraglia dal Grischun", a l'associaziun dals cussegls da scola dal Grischun sco er als departaments d'educaziun d'auters chantuns.

Las restanzas da la curt roiala a Zizers duain vegnir mantegnidas
Il chantun Grischun s'engascha per mantegnair las restanzas singularas d'edifizis ch'èn vegnidas exchavadas a Zizers e che appartegnevan ad ina curt roiala dal temp medieval tempriv. La regenza grischuna ha concludì da conceder a la vischnanca da Zizers ina contribuziun da 600'000 francs per cumprar il bain immobigliar "Schlossbungert". La premissa è che la vischnanca cumpria il bain immobigliar e ch'ella sa participeschia al pretsch da cumpra cun almain 150'000 francs. Da la confederaziun vegn empermessa ina contribuziun da 250'000 francs. Il pajament vegn fatg, cura ch'il contract da cumpra legalmain valaivel tranter la societad da construcziun e la vischnanca è avant maun.
Las restanzas singularas dals edifizis or dal 10. tschientaner èn vegnidas exchavadas dal servetsch archeologic dal Grischun. Quellas pon vegnir messas en connex cun la curt roiala d'Otto I. (912 fin 973) ch'è menziunada en scrit. Ultra da la curt roiala Pfalz al Lindenhof a Turitg è l'edifizi monumental a Zizers pir la segunda ovra da construcziun da tal gener cumprovada archeologicamain en Svizra. L'uffizi federal da cultura ha classifitgà il lieu da chat sco lieu archeologic d'impurtanza naziunala.
Per mantegnair il chat per generaziuns futuras èsi necessari ch'il patrun da construcziun desistia da realisar il project da construcziun approvà. Quai è pussaivel mo, sch'il maun public cumpra il bain immobigliar. Quel duai vegnir mess sut protecziun e pli tard vegnir rendì accessibel a la publicitad.

Relaschà ina nova ordinaziun chantunala davart l'aviatica
La regenza grischuna ha approvà e mess en vigur ina nova ordinaziun chantunala davart l'aviatica per il 1. da schaner 2011. L'ordinaziun regla la cumpetenza da las autoritads chantunalas en il sectur da la legislaziun federala davart l'aviatica.
Sco fin ussa è la regenza responsabla per approvar la nova determinaziun u l'annullaziun da plazzas d'atterrament da muntogna sco er per consultaziuns tar projects da legislaziun da la confederaziun. En il sectur spezialisà è er sco fin ussa cumpetent il departament da construcziun, traffic e selvicultura. El coordinescha sin plaun chantunal las proceduras da concessiun e da permissiun tranter auter per plazzas aviaticas u per occurrenzas aviaticas publicas sco er atterraments en muntogna ordaifer las plazzas aviaticas. L'uffizi d'agricultura e da geoinfurmaziun è responsabel per prender encunter, per examinar e per transmetter las annunzias davart impediments per l'aviatica. En cas d'accidents è la finala la procura publica cumpetenta per dumandar l'uffizi d'inquisiziun per accidents d'aviatica da far l'inquisiziun.
Perquai che puncts essenzials da l'ordinaziun precedenta dal cussegl grond na correspundevan betg pli a la legislaziun federala d'aviatica èsi necessari da relaschar ina nova ordinaziun chantunala davart l'aviatica.

Da vischnancas e da regiuns 

• Churwalden: La revisiun parziala da la planisaziun locala dals 27 da november 2009, concludida da la vischnanca da Malix (dapi il 1. da schaner 2010 vischnanca da Churwalden), vegn approvada.
• Nufenen: La revisiun parziala da la planisaziun locala da la vischnanca da Nufenen dals 15 da december 2009 vegn approvada.
• Zuoz: La revisiun parziala da la planisaziun locala, concludida da la vischnanca da Zuoz ils 7 d'avrigl 2010, vegn approvada.

Contribuziuns chantunalas a differentas instituziuns 

• Viafier retica: Il project "Rempar cunter bovas Magnacun" da la Viafier retica vegn approvà. Als custs vegn garantida ina contribuziun da 345'625 francs.

 

Gremi: regenza
Funtauna: rg chanzlia chantunala dal Grischun