Cun l'introducziun da la nova lescha davart l'assicuranza cunter la dischoccupaziun per il 1. d'avrigl 2011 vegnan a perder ca. 10 pertschient da las persunas che retiran prestaziuns lur dretg da survegnir prestaziuns d'assicuranza. L'uffizi per industria, mastergn e lavur (UCIML) vegn ad orientar en scrit las persunas pertutgadas che vivan en il Grischun.

Ils 26 da settember 2010 han las votantas svizras ed ils votants svizzers acceptà a l'urna la revisiun da la lescha davart l'assicuranza cunter la dischoccupaziun. La revisiun ha l'intent da metter l'assicuranza puspè en in equiliber finanzial e da reducir ils debits. D'ina vart vegnan reducidas tschertas prestaziuns, da l'autra vart vegnan las deducziuns dal salari augmentadas da 2,0 sin 2,2 pertschient. Questas contribuziuns vegnan pajadas mintgamai per la mesadad da las patrunas e dals patruns sco er da las lavurantas e dals lavurants. Entradas pli autas tranter 126'000 e 315'000 francs vegnan engrevgiadas supplementarmain cun in pertschient da solidaritad.

Il cussegl federal ha concludì il 1. d'october 2010 da metter en vigur la lescha revedida per il 1. d'avrigl 2011. A partir da quest termin vegnan ca. 10 pertschient da las persunas che retiran prestaziuns a perder lur dretg da survegnir prestaziuns d'assicuranza. Quai, perquai che lescha revedida resguarda pli fitg, quant ditg che la persuna respectiva ha lavurà en ina relaziun d'emploiada ed ha pajà sias premias, avant che pajar ils daners da dischoccupaziun.

Las persunas che retiran prestaziuns da l'assicuranza cunter la dischoccupaziun vegnan orientadas ad ura
Persunas che vivan en il Grischun e che perdan lur dretg da survegnir contribuziuns per il 1. d'avrigl 2011 vegnan orientadas en scrit dal UCIML la segunda mesadad da schaner. Il UCIML ch'è responsabel d'exequir la lescha davart l'assicuranza cunter la dischoccupaziun fa quint che ca. 300 persunas che vivan en il Grischun sajan pertutgadas. Il UCIML dat gronda paisa d'infurmar ad ura las persunas che retiran prestaziuns da l'assicuranza cunter la dischoccupaziun davart las novas regulaziuns.

Tenor la lescha revedida davart l'assicuranza cunter la dischoccupaziun ha ina persuna assicurada da nov il dretg da survegnir maximalmain 260 diarias (enfin ussa 400 diarias), sch'ella po cumprovar ch'ella haja pajà sias contribuziuns durant tut en tut 12 mais. En cas d'ina perioda da contribuziun da tut en tut 18 mais resta il dretg sco enfin ussa tar maximalmain 400 diarias. En cas da persunas sur 55 onns u en cas da persunas che retiran ina renta da la AI d'almain 40 pertschient vegn augmentada la perioda da contribuziun necessaria da 18 mais sin 24 mais en cas d'in dretg da survegnir 520 diarias. Ultra da quai vegnan reducidas las diarias da 260 a 90 en cas da persunas ch'èn liberadas d'ademplir la perioda da contribuziun. E la finala han persunas che n'han betg anc cumplenì il 25avel onn da vegliadetgna e che n'han naginas obligaziuns da mantegniment envers uffants il dretg da survegnir maximalmain 200 diarias.


Infurmaziuns:
- Paul Schwendener, manader da l'uffizi per industria, mastergn e lavur, tel. 081 257 23 45, e-mail: paul.schwendener@kiga.gr.ch  


Gremi: uffizi per industria, mastergn e lavur
Funtauna: rg uffizi per industria, mastergn e lavur