Dapi la fin d'avust sa fatschentan represchentantas e represchentants dal chantun Grischun, da las vischnancas da l'Engiadin'ota, dal circul da l'Engiadin'ota, da l'organisaziun turistica Engiadina San Murezzan, da l'Engadin Airport SA, da l'uffizi federal d'aviatica civila, dal corp da guardias da cunfin sco er spezialistas e spezialists d'aviatica (Swiss, eroport da Turitg ed universitad da Son Gagl) cun l'avegnir da la plazza aviatica regiunala en l'Engiadin'ota. Sco model organisatoric vegnint per garantir quest stabiliment d'infrastructura a lunga vista sa cristallisescha in nov model d'organisaziun cun integraziun dal maun public.

Ina gruppa directiva ch'è vegnida installada ils 30 d'avust 2010 è sa fatschentada cun la garanzia da la cuntinuitad segira, durablamain stabila e confurma als basegns da la plazza aviatica regiunala, e quai sin fundament da l'impurtanza che la plazza aviatica regiunala a Samedan ha per il turissem e per l'economia publica. Er en connex cun las investiziuns modestas d'infrastructura, che servan principalmain a la segirezza dal manaschi, sa mussi che las contribuziuns dal maun public èn inevitablas per il mantegniment e per la gestiun da la plazza aviatica a lunga vista e per ses svilup confurm als basegns, quai en consequenza da la pitschna productivitad analogamain al traffic public. Igl è vegnì sviluppà in model organisatoric che separa organisatoricamain e giuridicamain ils equipaments d'infrastructura da la giestiunaria da la plazza aviatica. Sco structura da finamira èn previsas ina societad d'infrastructura dal maun public ed ina societad da manaschi privata. L'infrastructura e la proprietad funsila restan uschia cumplettamain en proprietad dal maun public respectivamain vegnan surdadas al maun public. La societad d'infrastructura incumbensescha la gestiunaria da la plazza aviatica d'enfin ussa sco interpresa privata en il rom d'ina cunvegna da prestaziun cun la gestiun da la plazza aviatica regiunala. Sin questa basa duai la dimensiun dal manaschi da la plazza aviatica vegnir segirada durablamain ed eventualmain vegnir sviluppada vinavant confurm als basegns.

Las tractativas detagliadas vegnan manadas sin basa da questa cunvegna da princip durant las proximas emnas. Il concept definitiv po probablamain vegnir preschentà fin la primavaira 2011. Quest concept vegn a furmar la basa per l'approvaziun tras il maun public.


Infurmaziuns:
- cusseglier guvernativ dr. Mario Cavigelli, schef dal departament da construcziun, traffic e selvicultura dal Grischun, tel. 081 257 36 01
- Thomas Nievergelt, president communal da Samedan, tel. 081 851 07 10 ubain 081 851 17 77
- Andrea Parolini, pledader da pressa Engiadina Airport, tel. 081 851 08 22


Gremi: departament da construcziun, traffic e selvicultura
Funtauna: rg departament da construcziun, traffic e selvicultura