Quests dis vegnan tramess ils quints da taglia provisorics per la confederaziun, per il chantun e per numerusas vischnancas. I sa tracta dals quints da l'onn fiscal 2010. Quests quints ston vegnir pajads fin la fin da mars; il quint da las taglias chantunalas po vegnir pajà en duas ratas per la fin da favrer e per la fin d'avrigl. La facturaziun definitiva ha lieu pir pli tard, cura che la decleraziun da taglia è entrada, cura ch'ella è vegnida controllada e cura che l'onn fiscal 2010 è vegnì taxà.

Il quint da taglia provisoric sa basa sin ils facturs d'entradas e da facultad da l'ultima decisiun da taxaziun u da l'ultima decleraziun da taglia. Là, nua che las cifras han midà ferm, po vegnir dumandada ina facturaziun modifitgada. Ils pajataglias pon pretender quella en scrit tar l'uffizi communal da taglia cumpetent. En quest connex sto vegnir resguardà che indicaziuns fallidas davart las relaziuns effectivas pon avair per consequenza ch'i dat in tschains da retard.

Sch'i resulta ina prestaziun fiscala da main che 300.– francs per suveranitad fiscala (confederaziun, chantun e per part vischnancas) dals facturs da taglia enconuschents, vegni desistì – per motivs da custs – da far ina facturaziun provisorica. En quests cas vegnan las taglias messas a quint pir suenter che la taxaziun è vegnida fatga.
 
Per la facturaziun dals 24 da schaner èn vegnids producids en total 273'036 quints (confederaziun: 65'365; chantun: 112'387; vischnancas: 95'284). Quests quints èn vegnids pachetads en 133'995 cuvertas; per la confederaziun, per il chantun e (per part) per las vischnancas vegnan els pachetads en ina cuverta communabla. En tut èn vegnidas duvradas 4.42 tonnas palpiri. Per motivs da custs èn ils quints vegnids tramess per posta B e consegnads ils 21 da schaner a la posta; la posta dovra maximalmain sis dis da lavur per distribuir la spediziun en massa.
 
Ils quints 2010 èn vegnids producids cun il nov program d'informatica per l'incassament da taglia. Quest program substituescha ina soluziun d'informatica ch'è gia 30 onns veglia e che resta en funcziun mo pli per ils onns fiscals anteriurs. La stampa e l'emballadi dals quints vegnan fatgs entaifer il chantun tar l'uffizi d'informatica. Per quest intent stattan a disposiziun dus ferms stampaders da laser cun ina prestaziun per ura da ca. 9'000 paginas (4'500 fegls stampads da tuttas duas varts) sco er in sistem da pachetar en cuvertas cun ina prestaziun da var 3'000 cuvertas (che cuntegnan mintgamai in quint fiscal federal, chantunal e per part er communal) per ura.


Infurmaziuns:
Romeo Stetter, collavuratur da stab "dretg fiscal ed EED", administraziun da taglia, Tel. 081 257 33 28


Gremi: administraziun da taglia dal chantun Grischun
Funtauna: rg administraziun da taglia dal chantun Grischun