La regenza grischuna sustegna las stentas da schliar il concordat davart la scola auta svizra d'agronomia a Zollikofen. Ella ha approvà la missiva correspundenta e propona al cussegl grond d'acceptar la schliaziun. Il parlament vegn a tractar la fatschenta en la sessiun d'avrigl 2011.
La scola auta svizra d'agronomia a Zollikofen (SASA) en il chantun Berna vegn purtada dapi l'onn 1964 da tut ils chantuns da la Svizra e dal Liechtenstein en il rom d'in concordat. Dapi l'onn 1997 è ella integrada en la scola auta spezialisada bernaisa. La primavaira 2007 han plirs chantuns pretendì da schliar il concordat per motivs da la sistematica da furmaziun e d'integrar la scola auta d'agronomia cumplettamain en la scola auta spezialisada bernaisa.
Sco argument principal èsi vegnì numnà ch'ils concordats da purtaders, che tanschan sur ils cunfins da las scolas autas professiunalas or, n'han nagin dretg d'existenza pli suenter la furmaziun da las set regiuns da scolas autas professiunalas. Concordats cumparegliabels, sco p.ex. il cas dal tecnicum interchantunal a Rapperswil u il cas dal center da furmaziun professiunala a Wädenswil, èn gia vegnids schliads e las scolas èn vegnidas chantunalisadas.
Tant il cussegl dal concordat sco er il chantun Berna èn sa mussads d'accord da schliar il concordat sco planisà e d'integrar la scola auta svizra d'agronomia en la scola auta spezialisada bernaisa. La chantunalisaziun è previsa per il cumenzament da l'onn 2012.
La regenza grischuna sustegna questas stentas da schliar il concordat en enclegientscha tras in proceder coordinà dals purtaders. Per la decisiun da schliar il concordat ston tut ils purtaders dal concordat approvar la proposta. En il Grischun sto il cussegl grond decider davart quest project.
La scola auta svizra d'agronomia è in dals paucs centers da scolaziun svizzers per il cader en il sectur agrar, en il sectur forestal ed en il sectur da la tecnologia da victualias. L'onn 2009 han radund 360 studentas e students frequentà la scola auta, da quai eran 26 dal chantun Grischun. Suenter la schliaziun dal concordat regla la cunvegna davart las scolas autas professiunalas la gulivaziun da finanzas per las studentas e per ils students extrachantunals. Da nov ston ils chantuns, pia er il Grischun, pajar annualmain mo pli 26'000 francs per studenta u per student empè da la pauschala finanziala da 38'300 francs sco actualmain.
Infurmaziuns:
cusseglier guvernativ Hansjörg Trachsel, schef dal departament d'economia publica e fatgs socials, tel. 081 257 23 01
Gremi: regenza
Funtauna: rg chanzlia chantunala dal Grischun