Il post da stab per l'egualitad da las schanzas maina tras a partir d'immediat il program d'acziun "cundiziuns da lavur che tegnan quint da las famiglias per umens e per dunnas en las IPM dal Grischun". Il project vul sustegnair activamain las IPM tar l'analisa e tar la realisaziun da mesiras ch'èn favuraivlas per famiglias.

Meglierar en il chantun Grischun la cumpatibilitad da la lavur da famiglia cun la professiun è in postulat dal rapport da famiglia, da qual il cussegl grond ha prendì enconuschientscha l'onn 2007. Il post da stab per l'egualitad da las schanzas lantscha ussa communablamain cun il center "UND" sco er cun l'associaziun "denkstation" in program d'acziun per las IPM dal Grischun. Quest project vegn finanzià dal chantun Grischun, da la confederaziun e da sponsurs grischuns.

Tar il program d'acziun survegnan las IPM grischunas la pussaivladad d'analisar, sche lur cundiziuns da lavur porschan structuras favuraivlas per famiglias, da sviluppar mesiras individualas e da las testar sut instrucziun professiunala. La finamira dal program è quella da laschar profitar las IPM localas da las experientschas d'autras firmas e d'autras regiuns e da crear ina conscienza per ils aspects positivs economics da las cundiziuns da lavur ch'èn favuraivlas per las famiglias. Concretamain barattan las IPM participadas lur experientschas a maisas radundas e survegnan impuls per l'ulteriura realisaziun. Ellas han la pussaivladad da preschentar lur mesiras ad occurrenzas publicas. Il project vegn accumpagnà d'in cussegl consultativ.

Las cundiziuns da participaziun per las IPM sco er la descripziun detagliada dal project sa chattan sin la pagina d'internet dal post da stab per l'egualitad da las schanzas: www.stagl.gr.ch.


Infurmaziuns:
Susanna Mazzetta, manadra dal project, post da stab per l'egualitad da las schanzas, tel. 081 257 35 72 (me, ver), e-mail: Susanna.Mazzetta@stagl.gr.ch  


Gremi: post da stab per l'egualitad da las schanzas
Funtauna: rg post da stab per l'egualitad da las schanzas