La regenza grischuna ha avert la consultaziun tar ina nova lescha da publicaziun. Il chantun Grischun vul reglar da nov sias prescripziuns per publicaziuns uffizialas e resumar quellas en in'unica lescha. Ultra da quai ha la regenza concludì ina revisiun parziala da l'ordinaziun davart il "fond grischun per persunas dischoccupadas" e redigì sia posiziun tar in sboz da consultaziun da la confederaziun.

La consultaziun tar la lescha da publicaziun è averta
Il chantun Grischun vul reglar da nov sias prescripziuns per publicaziuns uffizialas e resumar quellas en in'unica lescha. La regenza grischuna ha deliberà per la consultaziun il sboz correspundent d'ina nova lescha da publicaziun.
Per sias publicaziuns uffizialas, sco las collecziuns da leschas ed il fegl uffizial, enconuscha il chantun oz mo prescripziuns fitg rudimentaras. Quai ha er gia chaschunà problems en il passà. Igl è pia necessari da resumar las differentas ordinaziuns existentas confurm al stgalim en ina nova lescha. La nova lescha davart las collecziuns da leschas e davart il fegl uffizial (lescha da publicaziun) duai cuntegnair in pèr paucas prescripziuns impurtantas. Questas prescripziuns sa restrenschan als organs da publicaziun ed a lur cuntegns, als geners da publicaziun per publicaziuns ordinarias ed extraordinarias, a la lingua da publicaziun sco er a l'effect giuridic da las publicaziuns. Tar ils organs da publicaziun uffizials dal chantun tutgan il cudesch da dretg grischun (collecziun sistematica da leschas) la collecziun uffiziala da leschas (collecziun cronologica da leschas) sco er il fegl uffizial dal chantun.
A medem temp è la nova lescha la basa per pudair desister en l'avegnir da la furma stampada dal cudesch da dretg grischun. A partir da l'onn 2012 duai il cudesch da dretg grischun cumparair mo pli en furma electronica. Quest pass s'impona, perquai ch'il dumber d'abunentas e d'abunents da la furma stampada è sa reducì fermamain e perquai ch'ils custs annuals da radund 80'000 francs per l'actualisaziun èn considerabels. Il chantun spargnass ulteriurs custs da radund 100'000 francs, sch'el pudess desister da la restampa integrala che daventa necessaria il proxim temp. Cunquai che la versiun stampada vegn actualisada mo mintga mez onn, consulteschan las persunas interessadas per gronda part il cudesch da dretg grischun en l'internet. La versiun electronica vegn actualisada tut tenor il basegn mintga di sut www.gr-lex.gr.ch e po vegnir consultada e stampada en il format da pdf.
Ils documents da consultaziun tar la lescha da publicaziun stattan a disposiziun sin la pagina d'internet da la chanzlia chantunala sut www.staka.gr.ch. La consultaziun dura fin ils 31 da matg 2011.

L'ordinaziun davart il "fond grischun per persunas dischoccupadas" vegn adattada
La regenza grischuna ha approvà ina revisiun parziala davart "il fond grischun per persunas dischoccupadas" ed ha mess en vigur quella per ils 14 da mars 2011. Da nov po il chantun surpigliar dal fond ils custs da las autoritads administrativas, d'organisaziuns publicas u privatas e d'interpresas, sche quai gida a mantegnair plazzas da lavur u sche quai è en l'interess da l'economia publica dal chantun.

La regenza beneventa l'iniziativa parlamentara davart ils agrocarburants
La regenza grischuna sustegna l'inziativa parlamentara "Agrocarburants: tegnair quint dals effects indirects". Ad ella para il proceder proponì d'esser raschunaivel, sco ch'ella scriva en sia resposta da consultaziun a la confederaziun.
Tras midadas da la lescha federala davart la taglia sin il petroli e da la lescha federala davart la protecziun da l'ambient ha l'iniziativa parlamentara l'intenziun da tegnair quint commensuradamain dals effects negativs, er indirects che resultan en connex cun la producziun da carburants biogens, e sche pussaivel d'als evitar. Per quest intent vegnan amplifitgads e rendids pli severs ils criteris, cun ils quals ils carburants biogens profitan en Svizra d'ina facilitaziun fiscala. Ultra da quai vegn il cussegl federal obligà d'introducir en cas da basegn in'obligaziun d'admissiun per carburants e combustibels biogens.
A l'avis da la regenza para il sboz da tegnair quint commensuradamain ed en moda equilibrada dals aspects dal dretg fiscal, dal dretg da l'ambient sco er da l'economia da martgà. Areguard la dumonda da la segirezza alimentara na persvada il sboz dentant betg. Qua dumonda la regenza d'examinar ina regulaziun pli rigurusa. La confederaziun pudess directamain excluder da la facilitaziun fiscala ils carburants biogens da l'emprima generaziun che vegnan per exempel producids or da tirc u or da graun e che mussan ina bilantscha ecologica negativa. Dal rest pretenda la regenza che la confederaziun accordeschia ses criteris cun ils standards da l'Uniun europeica.

Da vischnancas e da regiuns 

• Differentas vischnancas: La regenza approvescha il project "Reparaziun d'averturas 2011", in project collectiv da differentas vischnancas. Als custs da totalmain 92 projects che prevesan la reparaziun da vias da guaud ils proxims onns, vegn garantida ina contribuziun maximala da totalmain 9'520'000 francs.
• Castaneda: La revisiun parziala da la planisaziun locala, concludida da la vischnanca da Castaneda ils 16 d'avrigl 2008, vegn approvada.
• Tavau: La revisiun parziala da la planisaziun locala da la vischnanca da Tavau dals 26 da settember 2010 vegn approvada.

 

Contribuziuns chantunalas a differentas instituziuns 

• US Schluein-Glion: L'US Schluein-Glion survegn ina contribuziun da maximalmain 39'200 francs or dal fond da sport per sanar la plazza da trenament e la plazza principala sco er per installar ina illuminaziun sin la plazza principala.

 

Gremi: regenza
Funtauna: rg chanzlia chantunala dal Grischun