La cumissiun dal cussegl grond per furmaziun e cultura ha predeliberà la missiva da la regenza pertutgant l'aboliziun dal concordat concernent la scola auta svizra d'agronomia a Zollikofen en il chantun Berna e sustegna la proposta da la regenza.

En sia ultima sesida ha la cumissiun per furmaziun e cultura (CFC) – sut il presidi da deputada Sandra Locher Benguerel ed en preschientscha da cusseglier guvernativ Hansjörg Trachsel – concludì unanimamain da proponer al cussegl grond d'abolir il concordat concernent la scola auta svizra d'agronomia a Zollikofen (SASA).
 
La SASA exista gia dapi l'onn 1967 e vegn purtada – en il rom dal concordat – da tut ils chantuns da la Svizra. Per motivs dal sistem da furmaziun han differents chantuns proponì d'abolir il concordat e d'integrar la SASA cumplettamain en la scola auta spezialisada dal chantun Berna. Il chantun Berna e la SASA han pia fatg ina cunvegna da chantunalisaziun ch'è vegnida approvada il november 2009 dal cussegl dal concordat, ed il cussegl grond dal chantun Berna ha medemamain acceptà da surpigliar la scola.
 
La SASA è in center da scolaziun per persunas da cader dal sectur agrar, forestal ed alimentar e porscha scolaziuns da bachelor correspundentas cun la pussaivladad da las cumplettar cun in studi da master. Cun laschar surpigliar la SASA al chantun Berna poi vegnir evità ch'ella prendia donn pervia da l'extrada smanatschanta da differents chantuns. Cunzunt per ch'ella possia vegnir surpigliada èsi necessari che tut ils chantuns acceptian l'aboliziun dal concordat. La CFC ha pudì sa persvader dal senn e dal niz da quest proceder per il chantun Grischun ed approva unanimamain l'aboliziun dal concordat. Correspundentamain vegn ella er a recumandar questa aboliziun al cussegl grond che vegn a tractar la fatschenta la sessiun d'avrigl 2011.

Per las Grischunas e per ils Grischuns signifitga quai che la SASA a Zollikofen vegn a metter a disposiziun er vinavant ina scolaziun da buna qualitad per l'agronomia, per la selvicultura e per la tecnologia alimentara. La finala pon puspè profitar da quai er l'agricultura e la selvicultura dal Grischun. L'onn 2009 han tuttina frequentà 26 studentas e students dal chantun Grischun la SASA. Perquai ch'il chantun Berna surpiglia la SASA spargna il chantun Grischun er daners. El sto pajar – tenor la regulaziun dal dretg federal – il futur mo pli 26'000 francs per onn e per studenta u per student e betg pli la pauschala da finanziaziun vertenta tenor il concordat da 38'300 francs per persuna e per onn.


Infurmaziuns:
presidenta da la cumissiun Sandra Locher Benguerel, tel. 079 658 13 53


Gremi: cumissiun per furmaziun e cultura
Funtauna: rg cumissiun per furmaziun e cultura