La regenza grischuna ha deliberà en sia ultima sesida sias posiziuns davart intginas proceduras d'audiziun e da consultaziun da la confederaziun.

Crititgà la revisiun planisada da l'ordinaziun d'energia e da l'ordinaziun davart la protecziun da las auas da la confederaziun
La regenza grischuna refusa decididamain las adattaziuns da l'ordinaziun davart la protecziun da las auas che la confederaziun propona en il rom d'ina revisiun parziala da l'ordinaziun federala d'energia. Ina nova disposiziun duai obligar ils chantuns da procurar che trajects pli lungs d'auas currentas che sa chattan en in stadi natiral u en in stadi, ch'è datiers da la natira, vegnian mantegnids sche pussaivel senza midadas. Per quest intent vul la confederaziun fixar fin la fin da l'onn 2012 a maun d'ina recumandaziun ils criteris per la qualificaziun da lieus per ovras electricas pitschnas e per implants d'energia dal vent.
La regenza na sustegna betg quest intent. Sco ch'ella fixescha en sia audiziun a la confederaziun ston projects per ovras idraulicas e per implants d'energia dal vent gia oz ademplir in grond dumber da cundiziuns dal dretg da l'ambient. Ultra da quai ha la confederaziun gist mess en vigur per il 1. da schaner 2011 ina revisiun da la lescha davart la protecziun da las auas che cuntegna disposiziuns severas. Uschia na vegnan numerus dals projects gia annunziads betg a pudair vegnir approvads en il futur. Tenor l'avis da la regenza manca ultra da quai la basa legala per las novas disposiziuns che vegnan proponidas en l'ordinaziun davart la protecziun da las auas. La finala renviescha la regenza al fatg ch'ils chantuns sajan bain conscients da lur responsabladad, sch'els concedan concessiuns dal dretg da las auas. Pervia da quai n'èsi betg necessari che la confederaziun elavuria ulteriuras recumandaziuns.
Precis uschè cler refusa la regenza las midadas da l'ordinaziun d'energia ch'èn previsas per il sectur da las indemnisaziuns per cuvrir ils custs da la furniziun d'electricitad (ICF). Qua stuessan ins spetgar cun ina revisiun fin ch'ils resultats da l'evaluaziun currenta tras la confederaziun èn avant maun. Er en quest sectur refusa la regenza cleramain las stentas da l'administraziun federala da sfurzar tras cun cundiziuns supplementaras ina naziunalisaziun da la forza idraulica che surpassa las regulaziuns severas ch'existan gia en il sectur da l'ambient.

La regenza sustegna la participaziun a la cunvegna da la ONU davart ils dretgs da persunas cun impediments
La regenza grischuna sustegna da princip la participaziun da la Svizra a la cunvegna davart ils dretgs d'umans cun impediments (ICRPD). En sia resposta da consultaziun a la confederaziun renviescha ella dentant al fatg che las consequenzas giuridicas e finanzialas n'èn per part betg cleras. La finamira da la cunvegna da la ONU è quella da proteger umans cun impediments cunter discriminaziuns e da promover lur egualitad da las schanzas. Fin il cumenzament da december 2010 han 147 stadis suttascrit questa cunvegna e 96 l'han ratifitgada.
Tenor l'avis da la regenza correspunda la cunvegna da princip a las finamiras da la politica d'impediments ed a l'urden giuridic da la confederaziun e dals chantuns. Questa cunvegna ha oravant tut in caracter programmatic e mo in pitschen dumber da disposiziuns è applitgabel directamain. Tgeninas che quellas èn dependa però fermamain da l'interpretaziun. Tut tenor il resultat stoi vegnir fatg quint cun consequenzas finanzialas pli grondas per ils chantuns. Pervia da quai pretenda la regenza da la confederaziun d'examinar precisamain las consequenzas giuridicas e finanzialas da la cunvegna e da las preschentar detagliadamain en ina missiva. La finala exprima la regenza sias resalvas en il champ da furmaziun, perquai che la furmaziun scolastica avess da s'orientar – tenor la cunvegna – vi dal princip da l'inclusiun, senza ch'i fiss precis enconuschent, tge che quai importa per la Svizra.

Da vischnancas e da regiuns 

• Ruschein: La revisiun parziala da la planisaziun locala, concludida da la vischnanca da Ruschein ils 26 da schaner 2011, vegn approvada.
• San Murezzan: La revisiun parziala da la planisaziun locala, da la quala l'object è stà ina planisaziun d'utilisaziun che sa referescha al project da renovar e d'engrondir en etappas il Hotel Suvretta House, concludida da la vischnanca da San Murezzan ils 27 da settember 2009, vegn approvada. A medem temp ha la regenza refusà ils recurs da planisaziun ch'èn vegnids inoltrads.
• Sumvitg: La revisiun parziala da la planisaziun locala da la vischnanca da Sumvitg dals 14 da december 2010 vegn approvada.

 
Contribuziuns chantunalas a differentas instituziuns 

• Viafier retica: Il project "Rempar cunter bovas Seglias" da la Viafier retica vegn approvà. Als custs vegn garantida ina contribuziun da 2'574'000 francs.
• Scola-dimora a Cuira: Il project da la scola-dimora a Cuira da midar l'utilisaziun da las chombras dal zambregiar textil en in internat dal di, da translocar la chombra da la classa da l'integraziun professiunala sco er da sanar il palantschieu da la halla da gimnastica vegn approvà e sustegnì cun ina contribuziun da construcziun da maximalmain 61'000 francs.

 
Collecta da la rogaziun federala
Mintgamai in terz dal retgav da la collecta da la rogaziun federala 2011 va a l'uniun Insieme Grischun, Cuira, al project "Zwärg Riisa" da l'associaziun chantunala da la crusch blaua dal Grischun sco er al project "Scriver e leger meglier" da la crusch cotschna dal Grischun.

Projects da vias
La regenza ha approvà totalmain 13'567'000 francs per construir e per sanar ils suandants trajects da vias:
- via d'Andiast: lavurs d'impressari, Sut Plauncas
- via da Calanca: lavurs d'impressari, Grono – Pianecc e Grono – Ponte Arco
- via d'Engiadina: lavurs da cuvrida, sviament da Scuol
- via taliana: lavurs da cuvrida, Riòlta sut – Cruttisertobel, e lavurs d'impressari, Viganaia – Malabarba
- via dal Güglia: lavurs d'impressari en il vitg da Valbella
- via dal Landwasser: lavurs da cuvrida, Rotsch – OE Glaris
- via dal Luzisteig: lavurs d'impressari en il vitg da Maiavilla
- via dal Scanvetg: lavurs d'impressari vi dal mir da sustegn da Langwies
- via dal Meir: lavurs d'impressari e da cuvrida, Solas – tunnel d'Alvaschagn
- via dal Spleia: lavurs d'impressari al Bodmastafel
- via da St. Antönien: lavurs d'impressari vi da las punts a spunda Schaniala 2 e 3


Gremi: regenza
Funtauna: rg chanzlia chantunala dal Grischun