La regenza grischuna ha mess en vigur per il 1. da matg 2011 la nova lescha davart la protecziun da la natira e da la patria sco er l'ordinaziun correspundenta. Uschia stgaffescha il chantun la basa per ina protecziun effizienta da la natira e da la patria en il Grischun, ch'è confurma al temp.
Mess en vigur la nova lescha chantunala davart la protecziun da la natira e da la patria
La nova lescha davart la protecziun da la natira e da la patria dal chantun Grischun vegn messa en vigur per il 1. da matg 2011. Quai ha concludì la regenza grischuna. Il cussegl grond aveva relaschà la lescha ils 19 d'october 2010. Il termin da referendum è scadì ils 26 da schaner 2011. Entaifer quest termin n'èn vegnids inoltrads nagins referendums.
La lescha stgaffescha la basa per ina protecziun effizienta da la natira e da la patria en il Grischun, ch'è confurma al temp. Ella ha en emprima lingia l'intent d'exequir l'artitgel 81 da la constituziun chantunala. Tenor quel èn il chantun e las vischnancas obligads da prender mesiras per proteger la fauna e la flora sco er per mantegnair cuntradas e maletgs da lieus prezius, lieus istorics sco er objects natirals e bains culturals.
Per realisar la lescha chantunala davart la protecziun da la natira e da la patria è necessaria in'ordinaziun executiva da la regenza che remplazza las ordinaziuns vertentas tar la legislaziun davart la protecziun da la natira e da la patria e che regla l'execuziun da la nova lescha. L'ordinaziun è medemamain vegnida messa en vigur da la regenza per il 1. da matg 2011.
Da vischnancas e da regiuns
- Igis: A la vischnanca dad Igis vegn garantida ina contribuziun chantunala da construcziun dad 1'031'700 francs per construir ina nova halla da sport traidubla sin l'areal da scola Ried a Landquart.
- Brinzauls: Il project "Sistem da preavertiment per la zona da bovas Caltgeras" da la vischnanca da Brinzauls vegn approvà e sustegnì cun ina contribuziun da 184'800 francs.
- Bravuogn: La revisiun parziala da la planisaziun locala "Areal da la staziun" da la vischnanca da Bravuogn, ch'è vegnida concludida ils 7 da november 2006, vegn approvada.
- Furna: La revisiun da la planisaziun locala da la vischnanca da Furna dals 17 da settember 2010 vegn approvada.
- Val Müstair: La revisiun parziala da la planisaziun locala, concludida da la vischnanca da Val Müstair ils 3 da december 2010, vegn approvada.
Contribuziuns chantunalas a differentas instituziuns
- Viafier retica: Il project "Protecziun cunter lavinas e cunter crudada da crappa Muot, etappa 1" da la viafier retica vegn approvà. Als custs vegn garantida ina contribuziun da maximalmain 1'312'500 francs.
- "Protecziun cunter crudada da crappa Glatscheras": Il project "Protecziun cunter crudada da crappa Glatscheras" da l'uffizi da construcziun bassa dal Grischun sin il territori da la vischnanca da Bravuogn vegn approvà. Als custs vegn concedida ina contribuziun da maximalmain 1'200'000 francs.
- Ems-Chemie SA: Per renovar ils binaris da colliaziun da la Ems-Chemie SA tar las ovras da Domat vegn garantida ina contribuziun chantunala da maximalmain 254'500 francs.
Projects da vias
La regenza ha approvà totalmain 5'797'000 francs per construir e per sanar ils suandants trajects da vias:
- via dal Malögia: lavurs da cuvrida, Plaun dal Crot – Malögia Kulm
- via da Samignun: lavurs d'impressari e da cuvrida, Schalun – Val Pischöt
- via dal Scanvetg: lavurs d'impressari, St. Peter entaifer il vitg
Gremi: regenza
Funtauna: rg chanzlia chantunala dal Grischun