La cumissiun dal cussegl grond per sanadad e fatgs socials ha predeliberà la missiva da la regenza tar la revisiun parziala da la lescha davart l'assicuranza da malsauns e la reducziun da las premias e sustegna las propostas da la regenza.

Sut il presidi dal deputà Martin Candinas ed en preschientscha da cussegliera guvernativa Barbara Janom Steiner ha la cumissiun per sanadad e fatgs socials (CSF) decidì da proponer al cussegl grond d'approvar la revisiun parziala da la lescha davart l'assicuranza da malsauns e la reducziun da las premias (LARP).
 
La missiva da la regenza davart la revisiun parziala da la LARP cuntegna la realisaziun da la midada da la lescha federala davart l'assicuranza da malsauns (LAMal) dals 19 da mars 2010, en spezial il tractament da premias nunpajadas e da las participaziuns als custs sco er il pajament da la reducziun da las premias a las assicuranzas. Ils chantuns èn obligads da metter en vigur las midadas dal dretg federal che concernan ils art. 64a e 65 LAMal per il 1. da schaner 2012 cun in termin da realisaziun da dus onns.

Per il chantun Grischun pretenda la midada dal dretg federal in pèr adattaziuns dal dretg chantunal: il tractament da premias nunpajadas e da las participaziuns als custs, la nominaziun d'in post da revisiun per controllar, sche las pretensiuns da las assicuranzas envers las persunas assicuradas negligentas èn giustifitgadas, l'introducziun d'ina glista da las persunas assicuradas negligentas ed il pajament da la reducziun da las premias a las assicuranzas empè da a las persunas assicuradas. Las prescripziuns dal dretg federal na concedan al chantun er questa giada betg ina gronda libertad d'agir. Mo tar l'introducziun d'ina glista da las persunas assicuradas negligentas sa tracti d'ina prescripziun facultativa.
 
La cumissiun sustegna per gronda part las adattaziuns dal dretg chantunal che la regenza ha proponì, en spezial er l'introducziun d'ina glista da las persunas assicuradas negligentas ch'è per exempel gia vegnida introducida en il chantun Turgovia – cun effects positivs. La glista ch'il chantun Grischun fa quint d'introducir na duai però betg cuntegnair las persunas che na pon betg pajar, mabain mo quellas persunas che na vulan betg pajar lur premias e lur parts dals custs. En quest connex è er avant maun ina proposta da minoritad da la cumissiun che dumonda da renunziar a l'introducziun d'ina tala glista. Dal rest vegn beneventà unanimamain da la cumissiun il pajament da la reducziun da las premias a las assicuranzas empè da – sco enfin ussa – a las persunas assicuradas. Beneventada vegn er la nova regulaziun, tenor la quala l'obligaziun existenta da las vischnancas da stuair surpigliar las premias e las participaziuns als custs debitadas è vegnida abolida e premias e participaziuns als custs nunincassablas vegnan surpigliadas da nov dal chantun.

Il cussegl grond vegn a tractar la revisiun parziala da la LARP en la sessiun da zercladur 2011.


Infurmaziuns:
president da la cumissiun Martin Candinas, tel. 078 841 66 86


Gremi: cumissiun per sanadad e fatgs socials
Funtauna: rg cumissiun per sanadad e fatgs socials