La regenza grischuna beneventa la liberalisaziun da las uras d'avertura da las butias tar tancadis. Ultra da quai beneventa ella en sia posiziun tar la procedura da consultaziun da la confederaziun la simplificaziun da las reglas dal traffic e da las signalisaziuns da las vias.

La regenza sustegna l'iniziativa parlamentara davart la liberalisaziun da las uras d'avertura da las butias tar tancadis
En sia resposta da consultaziun beneventa la regenza grischuna l'iniziativa parlamentara "Liberalisaziun da las uras d'avertura da las butias tar tancadis". Cun quai sustegna ella la proposta che butias tar tancadis che sa chattan sin pausadis d'autostrada ed a vias principalas dastgan engaschar lavurantas e lavurants di e notg sco er la dumengia senza permissiun, sch'ellas han in sortiment da rauba e da servetschs che tegna en emprima lingia quint dals basegns da las viagiaturas e dals viagiaturs. Enfin ussa è quai stà il cas mo per la vendita da carburant e da products gastronomics. La regenza motivescha sia posiziun en emprima lingia cun ils basegns da las consumentas e dals consuments e cun il dumber creschent da butias tar tancadis che pretenda regulaziuns novas ed adattadas per la pratica.

La revisiun totala da las ordinaziuns davart las reglas dal traffic sin via e davart la signalisaziun da las vias planisada vegn beneventada
La regenza grischuna va da princip d'accord cun la revisiun totala da las ordinaziuns davart las reglas dal traffic sin via e davart la signalisaziun da las vias previsa da la confederaziun. Ella beneventa che las prescripziuns vegnan modernisadas ed adattadas als basegns actuals. Grazia a la revisiun totala survegnan ultra da quai singuls signals da traffic ina cumparsa pli actuala, auters vegnan schizunt abolids per reducir il "guaud da signals".
Las ordinaziuns davart las reglas dal traffic sin via e davart la signalisaziun da las vias èn en vigur gia dapi decennis. Las revisiuns parzialas ch'èn vegnidas fatgas dapi l'entrada en vigur rendan adina pli difficila la survista e la chapaivladad da las prescripziuns.

Da vischnancas e da regiuns 

• Cazas: A la via da la Mantogna dadora, a la via da Purtagn ed a la via da Sarn vegn abgiuditgà da la regenza il status da via da colliaziun chantunala. Per il 1. da fanadur 2011 vegnan ellas cedidas a la vischnanca da Cazas sco proprietad e per il mantegniment.
• Sumvitg: La via da Sogn Benedetg e la via da Clavadi vegnan abgiuditgadas sco vias chantunalas da colliaziun e vegnan cedidas a la vischnanca da Sumvitg sco proprietad e per il mantegniment per il 1. da fanadur 2011.
• Trin: La regenza approvescha il project "Incendi da guaud Runca / Munt Sura". Ella sustegna quest project cun ina contribuziun da 45'300 francs e conceda in credit rembursabel e senza tschains dad 1'488'000 francs.

 
Projects da vias
La regenza ha approvà totalmain 7'574'000 francs per construir e per sanar ils suandants trajects da vias:
- via da Compatsch: lavurs d'impressari, via da Samignun – Compatsch
- via dal Güglia: lavurs d'impressari e preparaziun da material, Mot – Sur Gonda
- via da Miraniga: lavurs d'impressari, Miraniga – Misanenga
- via dal Partenz: lavurs d'impressari e da cuvrida, punt dal Wijertobel
- via da Samignun: lavurs d'impressari e da cuvrida, Pfandshof – Samignun


Gremi: regenza
Funtauna: rg chanzlia chantunala dal Grischun