Ier è stà il termin il pli baud pussaivel per inoltrar propostas electoralas per las elecziuns dal cussegl naziunal. Tar la chanzlia chantunala dal Grischun èn entradas 13 glistas cun propostas electoralas. Oz mardi suentermezdi, ils 24 da matg 2011, vegnan ils numers da glista per l'emprima giada attribuids a las glistas cun trair la sort. Ils resultats vegnan alura publitgads sin la pagina d'internet www.gr.ch.

En il chantun Grischun è vegnida reglada da nov la numeraziun da las glistas da las elecziuns dal cussegl naziunal. Per consequenza n'è betg pli la fermezza da las partidas u da las organisaziuns a chaschun da las ultimas elecziuns decisiva per la numeraziun, mabain da nov la successiun, en la quala las glistas electoralas vegnan inoltradas. Sche pliras glistas electoralas vegnan inoltradas il medem di, decida la sort davart la numeraziun.

Ier glindesdi, ils 23 da matg 2011, è stà il termin il pli baud per inoltrar propostas electoralas. Totalmain èn entradas 13 glistas tar la chanzlia chantunala dal Grischun. Oz mardi suentermezdi, ils 24 da matg 2011, realisescha la chanzlia chantunala per l'emprima giada l'attribuziun dals numers da glista cun trair la sort. Ils resultats vegnan alura publitgads sin la pagina d'internet www.gr.ch. L'attribuziun dal numer da glista vegn fatga avant che terminar l'examinaziun da las propostas electoralas per las elecziuns dal cussegl naziunal. Ella vegn pia fatga cun la resalva che la glista inoltrada saja valaivla.

Ulteriuras propostas electoralas pon vegnir inoltradas fin a l'ultim termin glindesdi, ils 5 da settember 2011. L'ultim termin per midar las glistas inoltradas e per declerar colliaziuns da glistas è ils 12 da settember 2011. Las elecziuns dal cussegl naziunal han lieu ils 23 d'october 2011.


Infurmaziun per las medias:
Las collavuraturas ed ils collavuraturs da las medias ch'èn interessads pon esser preschents, cur ch'i vegn tratg la sort per ils numers da las glistas. Quai ha lieu oz mardi suentermezdi, ils 24 da matg 2011, a las 14.15, en la sala da la regenza (chasa grischa, 2. plaun) a Cuira. Ellas ed els vegnan supplitgads da s'annunziar per e-mail tar florian.joerg@staka.gr.ch.


Infurmaziuns:
Walter Frizzoni, vicechancelier, chanzlia chantunala dal Grischun, tel. 081 257 22 22


Gremi: chanzlia chantunala dal Grischun
Funtauna: rg chanzlia chantunala dal Grischun