La cumissiun per sanadad e fatgs socials ha predeliberà ed approvà per mauns dal cussegl grond la missiva da la regenza davart la revisiun parziala da la lescha per promover la tgira da persunas malsaunas e l'assistenza da persunas attempadas e da persunas che basegnan tgira (lescha per promover la tgira da persunas malsaunas).

Sut il presidi dal deputà Martin Candinas ha la cumissiun per sanadad e fatgs socials (CSF) decidì en duas sesidas d'in entir di, da proponer al cussegl grond d'approvar la revisiun parziala da la lescha per promover la tgira da persunas malsaunas e l'assistenza da persunas attempadas e da persunas che basegnan tgira (lescha per promover la tgira da persunas malsaunas). A las sesidas è er sa participada la cussegliera guvernativa Barbara Janom Steiner.

La missiva da la regenza davart la revisiun parziala da la lescha per promover la tgira da persunas malsaunas pertutga la realisaziun da las midadas da la lescha federala davart l'assicuranza da malsauns ch'èn vegnidas concludidas sin il plaun federal e che pertutgan il sectur da la finanziaziun chantunala dals ospitals, entran en vigur per il 1. da schaner 2012. La cumissiun dal cussegl grond ha stuì predeliberar questa fatschenta sut cundiziuns difficilas, damai ch'explicaziuns davart las consequenzas finanzialas dal project na pon actualmain anc betg vegnir fatgas: Tant l'autezza da las pauschalas pro cas per il tractament staziunar – che valan a partir dal 1. da schaner 2012 – sco er l'autezza dal supplement per ils custs da l'utilisaziun da l'implant n'èn per il mument anc betg enconuschents.
 
Suenter ina debatta intensiva ha la cumissiun approvà per gronda part il project elavurà da la regenza e propona al cussegl grond da l'acceptar. Midadas èn vegnidas fatgas praticamain mo da natira formala. En connex cun la participaziun als custs dal chantun e da las vischnancas tar las contribuziuns als ospitals, a clinicas ed a las chasas da parturir propona la cumissiun al cussegl grond d'integrar en la lescha – en divergenza da la missiva – ina repartiziun dals custs da 90 pertschient a quint dal chantun e da 10 pertschient a quint da las vischnancas. Uschia fa la cumissiun ina repartiziun da las grevezzas a favur da las vischnancas. Cumpareglià cun oz vegn stimà che las vischnancas vegnan distgargiadas per passa sis milliuns francs. En quest connex ha la cumissiun plinavant mess en discussiun il sistem actual da la finanziaziun dals ospitals e da la tgira en il chantun Grischun. En la proxima sessiun vegn ella ad inoltrar ina incumbensa al cussegl grond, tenor la quala il sistem duai vegnir examinà detagliadamain. La cumissiun vuless vegnir infurmada da la regenza, sch'i fiss en il futur imaginabel e pussaivel da realisar ina finanziaziun dals ospitals sulettamain tras il chantun ed ina finanziaziun da la tgira sulettamain tras las vischnancas.
Il cussegl grond vegn a tractar la revisiun parziala da la lescha per promover la tgira da persunas malsaunas en la sessiun da zercladur 2011.


Infurmaziuns:
president da la cumissiun Martin Candinas, tel. 078 841 66 86


Gremi: cumissiun per sanadad e fatgs socials
Funtauna: rg cumissiun per sanadad e fatgs socials