Per l'engrondiment planisà dal museum d'art dal Grischun a Cuira conceda signur Henry Carl Martin Bodmer ina donaziun en la dimensiun da 20 milliuns francs al chantun Grischun. Signur Bodmer ed il president da la regenza dr. Martin Schmid han suttascrit in'empermischun da donaziun correspundenta.

Signur Henry Carl Martin Bodmer è burgais da Turitg e da Flem. A chaschun da ses 80avel anniversari e sin fundament da sia affecziun speziala per il Grischun metta el a disposiziun ina contribuziun da 20 milliuns francs per l'engrondiment dal museum d'art dal Grischun. Per questa donaziun fitg generusa ha la regenza engrazià cordialmain a signur Bodmer.
 
La donaziun permetta da dimensiunar l'engrondiment planisà dal museum d'art dal Grischun confurm als basegns e d'al accelerar considerablamain. Cumenzar uschè spert sco pussaivel cun las lavurs da construcziun è il giavisch tant da signur Bodmer sco er dal chantun. Cuntrari al plan da termins actual na duai la missiva per il credit da construcziun al cussegl grond betg vegnir elavurada pir suenter che la concurrenza da projects è terminada, mabain parallelamain. Uschia planisescha la regenza da suttametter la missiva al cussegl grond durant la sessiun da favrer u d'avrigl 2012. Sch'i na dat nagins retardaments pon ins quintar che las lavurs da construcziun cumenzan a partir da la mesadad da l'onn 2013.
 
L'engrondiment è necessari per motivs da mancanza da spazi en il museum d'art. Empè dals 3'800 meters quadrat surfatscha ch'èn cumprovads sco necessaris en la concepziun dal museum, stattan a disposiziun mo circa 2'000 meters quadrat.


Infurmaziuns:
- president da la regenza dr. Martin Schmid, schef dal departament da finanzas e vischnancas, tel. 081 257 32 01
- cusseglier guvernativ dr. Mario Cavigelli, schef dal departament da construcziun, traffic e selvicultura dal Grischun, tel. 081 257 36 01


Gremi: regenza
Funtauna: rg chanzlia chantunala dal Grischun