La regenza grischuna ha mess en vigur differentas revisiuns da leschas ch'èn vegnidas concludidas dal cussegl grond en il rom da la refurma da vischnancas. Ultra da quai ha ella deliberà sia resposta da consultaziun tar l'adattaziun previsa da la lescha federala davart la planisaziun dal territori.

Refurma da vischnancas: differentas revisiuns da leschas entran en vigur
En il rom da la refurma da vischnancas currenta ha la regenza mess en vigur per il 1. da fanadur 2011 quatter revisiuns da leschas ch'eran vegnidas approvadas dal cussegl grond en sia sessiun da favrer, numnadamain la revisiun parziala da la lescha da vischnancas, da la lescha davart la gulivaziun da finanzas intercommunala, da l'ordinaziun executiva tar la lescha davart la gulivaziun da finanzas intercommunala e da la lescha davart las vias. 
Las revisiuns parzialas èn vegnidas concludidas dal cussegl grond ils 16 da favrer 2011. Cunter questas revisiuns parzialas n'èsi betg vegnì fatg in referendum. Sco novaziun vegnan votaziuns da quorum en cas da fusiuns da vischnancas pia messas en l'avegnir sin ina basa legala. A medem temp vegnan reducids impediments da fusiun en connex cun la gulivaziun da finanzas e cun l'access tras vias chantunalas.

La proposta da schluccar las disposiziuns per renovar edifizis d'abitar ordaifer la zona da construcziun vegn beneventada
En sia resposta da consultaziun sustegna la regenza grischuna la revisiun previsa da la lescha federala davart la planisaziun dal territori. La finamira da quella è ina liberalisaziun da l'utilisaziun d'edifizis d'abitar oriundamain agriculs ch'èn situads ordaifer las zonas da construcziun.
La proposta è vegnida elavurada da la cumissiun per ambient, planisaziun dal territori ed energia dal cussegl naziunal en il rom da l'iniziativa dal chantun "Construir ordaifer la zona da construcziun" dal chantun Son Gagl. Cun la revisiun na duain las permissiuns per renovar edifizis d'abitar ordaifer la zona da construcziun betg pli depender en il futur da la dumonda, sch'in edifizi è vegnì duvrà l'onn 1972 per l'agricultura u betg. Per las permissiuns vala oz il 1. da fanadur 1972 sco di da referenza, il qual è entrada en vigur la separaziun consequenta dal territori da construcziun e dal territori betg da construcziun en il dretg federal.
Tenor la regenza po la regulaziun vertenta chaschunar retardaments e cas da dispita, perquai ch'il diever da l'onn 1972 è per part grev da cumprovar. Medemamain beneventa la regenza che la pussaivladad da reconstruir in edifizi vegn liada a la cundiziun che l'aspect exteriur da quel na dastga betg vegnir midà essenzialmain. Tras quai duai vegnir impedì ch'il caracter da las cuntradas agriculas giaja plaunsieu a perder. Tenor l'avis da la regenza procura questa regulaziun che la cuntrada da cultura pertutgada mantegnia sia identitad. Tar la reconstrucziun vegnan uschia ultra da quai evitads svilups negativs en moda efficazia.

Contribuziuns chantunalas a differentas instituziuns 

• Center da geriatria Guggerbach a Tavau: Per stgaffir 36 letgs da tgira supplementars en il center da geriatria Guggerbach a Tavau vegn garantida ina contribuziun chantunala d'investiziun da totalmain 5'760'000 francs.
• Chasa da persunas attempadas e da tgira S. Martin a Cazas: Per engrondir e per renovar la chasa da persunas attempadas e da tgira S. Martin a Cazas, cun midar chombras da dus letgs en 6 chombras novas d'in letg, vegn garantida ina contribuziun chantunala d'investiziun da 720'000 francs.
• "Siglientada da lavinas Val da Föglia": Il project "Siglientada da lavinas Val da Föglia" a la via da Samignun sin il territori da la vischnanca da Tschlin vegn approvà e sustegnì cun ina contribuziun da 423'750 francs.
• "Center da sandà Engiadina Bassa": En il rom da la nova politica regiunala da la confederaziun (NPR) vegn garantida a la fundaziun "Center da sandà Engiadina bassa" per il project "Regiun dal parc naziunal – regiun da sanadad" ina contribuziun totala da maximalmain 690'000 francs per la perioda da project da 2011 fin 2015.
• Uniun d'agid umanitar per la Russia: Per la 20avla missiun d'agid da l'uniun d'agid umanitar per la Russia vegn concedida ina contribuziun da 30'000 francs.

 

Projects da vias
La regenza ha approvà totalmain 1'630'000 francs per construir e per sanar ils suandants trajects da vias:
- via da Haldenstein: lavurs d'impressari e da cuvrida en il vitg da Haldenstein
- via da Jenins: lavurs d'impressari e da cuvrida "Im Zogg – Teilerrüfi"


Gremi: regenza
Funtauna: rg chanzlia chantunala dal Grischun