Il dretg federal oblighescha la confederaziun, ils chantuns e las vischnancas d'infurmar en moda adequata las persunas estras davart las cundiziuns da viver e da lavurar en Svizra sco er davart las purschidas d'integraziun existentas. Medemamain duai la populaziun vegnir orientada davart la politica da migraziun e davart la situaziun speziala da las persunas estras. Per ademplir questa incumbensa realisescha il post spezialisà per l'integraziun dal Grischun dus mediums d'infurmaziun, numnadamain la plattafurma d'internet www.integration.gr.ch e la broschura da bainvegni per migrantas e per migrants novarrivads ch'è disponibla en 12 linguas.

www.integration.gr.ch
La pagina d'internet www.integration.gr.ch sa drizza a persunas estras novarrivadas e gia domiciliadas, a la populaziun indigena sco er a las autoritads, ad instituziuns ed ad organisaziuns ch'èn activas en il sectur da l'integraziun.

Ella dat a las persunas immigradas ina survista cumplessiva davart la vita en Svizra ed en il chantun Grischun. Ultra da preschentar la basa da la politica d'integraziun infurmescha ella davart temas d'integraziun actuals, davart occurrenzas e davart purschidas d'integraziun existentas. Ins chatta plinavant adressas, contacts, links ed infurmaziuns davart publicaziuns che tematiseschan l'integraziun.

Per entant datti mo ina versiun tudestga da la pagina d'internet. La versiun rumantscha, taliana ed englaisa vegnan a star a disposiziun a partir da l'atun 2011.

Broschura d'infurmaziun per persunas estras novarrivadas
In'emprima ediziun da la broschura che cumpiglia 7'200 exemplars vegn publitgada en albanais, englais, franzos, portugais, serbocroat, somali, spagnol, talian, tamil, tigrinya, tirc e tudestg. Ella duai vegnir distribuida gratuitamain da las vischnancas a las persunas estras novarrivadas a partir da la stad 2011. Instituziuns socialas ed organisaziuns da migrantas e da migrants pon er empustar la broschura tar il post spezialisà per l'integraziun e la distribuir a persunas gia domiciliadas che han deficits d'infurmaziun. Sin la pagina d'internet www.integration.gr.ch po la broschura vegnir consultada sco document da PDF en tut las linguas disponiblas.


Infurmaziuns:
- cussegliera guvernativa Barbara Janom Steiner, scheffa dal departament da giustia, segirezza e sanadad, tel. 081 257 25 01
- Patricia Ganter Sonderegger, incumbensada d'integraziun, uffizi da fatgs da polizia e da dretg civil, tel. 081 257 36 81, e-mail: patricia.ganter@apz.gr.ch


Gremi: departament da giustia, segirezza e sanadad
Funtauna: rg departament da giustia, segirezza e sanadad